Тайвандаги MSI (Мicro-Star International) номли компьютер технологиялари ишлаб чиқарувчи компания “Ўйинчоқлар тарихи” анимацион фильмининг 30 йиллиги муносабати билан чекланган миқдордаги МАG PANO Тоy Story Edition шахсий компьютерларини тақдим этди. Ушбу серия Pixar мультфильмининг асосий қаҳрамонлари — Базз Лайтер ва Вудига бағишланган дизайни билан ажралиб туради.
Компьютернинг юбилей версияси мультфильм қаҳрамонлари услубида безатилган бир нечта қисмларни ўз ичига олади. Масалан, RТХ 5070 Гаминг Трио видеокартаси Базз Лайтер услубида ишланган, Z890 Gaming plus она плата эса шериф Вуди услубига хос рангларда тақдим этилган.
Суюқ совитиш тизими ўзга сайёраликлар расми билан безатилган, МАG PANO 110R корпуси эса мультфильм биринчи қисмидаги машҳур яшил махлуқчаларни эслатади.
Бундан ташқари, А850ГЛ қувват блоки ва мультфильм қаҳрамонлари ўйинчоқлари ҳам комплектацияга киради. Компьютер тўлиқ комплект ҳолатида сотилади: у Intel Core Ultra 5 245К процессори, 32 ГБ тезкор хотира ва 1 ТБ ССД билан жиҳозланган.
Компьютер нархи 80 900 Тайван доллари (тахминан 2733 АҚШ доллари)ни ташкил қилади. MSI жами 500 дона шундай компьютер ишлаб чиқарган. Айни пайтда уларни фақат Тайван бозорларида харид қилиш мумкин. Компания вакилларининг айтишича, мухлислар томонидан катта қизиқиш билдирилса, тематик компьютерлар халқаро бозорда ҳам сотувга чиқарилиши мумкин.
Маълумот учун, “Ўйинчоқлар тарихи” мультфильми илк бор 1995 йил 22 ноябрда экранларга чиққан ва у тўлиқ 3D форматда яратилган дунёдаги биринчи тўлиқ метражли анимацион фильм ҳисобланади. Фильм Pixar учун катта муваффақият олиб келган ва бутун дунё бўйлаб 373 миллион доллар даромад келтирган. Бугунги кунга қадар унинг тўртта асосий қисми, бир нечта қисқа метражли анимациялари ва спин-оффълари ишлаб чиқилган.
Изоҳ (0)