Ҳиндистоннинг Чхаттисгарх штати Дхаматерия туманида 30 ёшли эркак телефонда гаплашаётган пайтда чақмоқ урилиши оқибатида вафот этди. Бу ҳақда India Today нашри хабар бермоқда.
Марҳумнинг исми Роҳит Кумар Синха бўлиб, у ҳожатхона қурилишини назорат қилиш учун уйдан чиққан ва айни пайтда уяли телефонида суҳбатлашаётган бўлган. Маълум қилинишича, чақмоқ уриши оқибатида унинг қўлидаги қурилма портлаб кетган.
Роҳит дарҳол яқин атрофдаги шифохонага олиб борилган. Жароҳатларнинг оғирлиги сабабли шифокорлар уни туман касалхонасига юборишга қарор қилишган, аммо у йўлда жон берган
“У ишдан уйга қайтгач, ҳовлисидаги ҳожатхона қурилишини текшириш учун ташқарига чиққанида, унга чақмоқ урган”, дейди марҳумнинг қариндоши.
Роҳитни кўздан кечирган шифокорнинг фикрига кўра, мобил телефон чақмоқни ўзига тортган бўлиши мумкин, бу эса портлашга ва оқибатда ўлимга сабаб бўлган. Унинг таъкидлашича, мобил телефонларда нурланиш ва магнит хусусиятларига эга қисмлар мавжуд бўлиб, улар атмосфера электр разрядларини ўзига жалб қилиши мумкин.
Апрель ойида Ҳиндистоннинг шарқий Бихар штатида яшин уриши оқибатида 22 киши ҳалок бўлгани хабар қилинганди.
Изоҳ (0)