Ҳиндистон шифокорлари 12 июнь кунги Аҳмадобод авиаҳалокатида топилган жасадлар 270 га етганини маълум қилди. Бу ҳақда BBC хабар берди.
Лондонга учаётган самолёт ҳавога кўтарилганидан кўп ўтмай турар жой ҳудудига қулаб тушиб, 242 йўловчи ва экипаж аъзоларидан бири, 40 ёшли британиялик эркакдан ташқари барчаси ҳалок бўлганди.
Расмийлар ерда қанча одам ҳалок бўлганини аниқлашга ҳаракат қилиб, қурбонларнинг шахсини тасдиқлаш учун ДНК намуналарини текшириш билан шуғулланган. Ҳиндистон ва Буюк Британияда марҳумларни хотирлаш маросимлари бўлиб ўтган.
15 июнь куни Лондондаги Ҳиндистон Олий комиссияси олдида 100 га яқин одам йиғилган. Ҳодисада ҳалок бўлганлар хотирасига шамлар қўйилган. Жамият етакчиларидан бири яқинларининг қолдиқларини аниқлаш учун Ҳиндистонга учиб кетган ва ДНК текшируви натижаларини шифохонада кутаётган оила билан боғланганини айтган. Кўпчилик воқеа қандай ва нима учун содир бўлганини билиш истагидалиги билдирилган.
Ҳиндистоннинг самолёт ҳалокатларини текшириш бюроси АҚШ ва Буюк Британия жамоалари ёрдамида ҳалокат сабабларини ўрганишга раҳбарлик қилмоқда. 13 июнь куни самолёт ҳалокатга учраган жойда қора қути топилган. Ҳиндистон фуқаро авиацияси вазири Рам Моҳан Наиду Кинжарапу бу топилма ҳалокат бўйича суриштирувга катта ёрдам беришини билдирган.
14 июнь куни шифокорлар касалхонага 270 нафар жабрланувчининг жасади етиб келганини тасдиқлаган. Улардан 241 нафари AI171 рейси йўловчилари ва экипаж аъзолари экани тахмин қилинмоқда. Шунингдек, ўттиздан ортиқ қурбонлар қариндошлари томонидан тақдим этилган ДНК намуналари ёрдамида расман аниқланган.
Flightradar24 кузатув сайти маълумотларига кўра, Boeing Dreamliner 787-8 11 йилдан бери фаолият юритаётган бўлган ва сўнгги 2 йил ичида Аҳмадободдан Лондонга 25 та рейсни амалга оширган.
Изоҳ (0)