Ғазо секторида оғир гуманитар инқироз фонида бир килограмм шакарнинг нархи 100 долларгача кўтарилди. Бу ҳақда ярим эксклав қабилалар кенгаши вакили Хаил Абу ал-Ҳусайн маълум қилди.
“Уруш туфайли одамлар кўчада ва чодирли шаҳарчаларда яшашга мажбур бўлмоқда. Бир килограмм шакар, агар у умуман топилса, 100 доллар туради. Асосий озиқ-овқат маҳсулотлари бутунлай йўқ. Одамлар гуманитар ёрдам колонналарига ташланяпти”, деди у.
Al Qahera News телеканалининг хабар беришича, 30 июль куни Ғазо ҳудудига Мисрнинг тўртинчи гуманитар карвони кириб келган. Сўнгги кунларда мамлакат секторга камида беш минг тонна юк, жумладан, озиқ-овқат, энг зарур нарсалар ва тиббий жиҳозларни етказиб берди. Шу билан бирга, гуманитар ташкилотлар вакиллари давом этаётган можароли вазиятда бу ёрдамни аҳоли ўртасида тўғри тақсимлашнинг имкони йўқлигини таъкидламоқда.
БМТнинг фаластинлик қочқинларга ёрдам кўрсатиш ва ишларни ташкил этиш бўйича Яқин Шарқ агентлиги (BAPOR) маълумотларига кўра, озиқ-овқат маҳсулотлари нархлари 40 баробар кўтарилган.
Ташкилот маълумотларига кўра, гуруч ва ун нархи 30 долларгача қимматлашган.
“Шу пайтда Ғазо яқинидаги BAPOR омборларида бутун аҳолини уч ойдан ортиқ таъминлай оладиган озиқ-овқат захиралари мавжуд. Ғазодаги азоб-уқубатлар инсон қўли билан яратилган ва уларга чек қўйиш зарур. Қамал олиб ташлансин ва инсонпарварлик ёрдами хавфсиз ҳамда зарур миқдорда етказиб берилишига имкон яратилсин”, -дея таъкидлади BAPOR бош комиссари Филипп Лаззарини
Бундан аввал Исроилнинг “Бецелем” ва “Инсон ҳуқуқлари учун шифокорлар” ташкилотлари алоҳида баёнотлар билан чиқиб, мамлакат ҳукуматини фаластинликларни қирғин қилишда айблаганди.
Изоҳ (0)