Англиянинг “Манчестер Юнайтед” клуби ёзги трансфер ойнасида янги дарвозабон сотиб олишга ҳаракат қилмоқда. Клуб раҳбарияти камерунлик посбон Андре Онананинг ўтган мавсумдаги кўплаб хатолари ва жароҳатларини инобатга олиб, бу позиция учун ишончли номзод изламоқда.
The Telegraph нашрининг хабар беришича, “қизил иблислар” Италия терма жамоаси дарвозабони Жанлуижи Доннарумма борасида “ПСЖ”га сўров юборган.
Маълумотларга кўра, парижликлар Доннаруммани шу ёзда сотиб юбориш ниятида. Сабаби, унинг клуб билан амалдаги шартномаси 2026 йилнинг ёзида якунланади. Шартномани узайтириш бўйича олиб борилаётган музокаралар эса мураккаб кечмоқда. Агар томонлар келишувга эриша олмаса, “ПСЖ” кейинги мавсум охирида дарвозабонни эркин агент сифатида қўйиб юборишга мажбур бўлади.
“Манчестер Юнайтед” эса ушбу вазиятдан фойдаланиб, 26 ёшли посбонни ўз таркибига қўшиб олишни мақсад қилган. Агар музокаралар ижобий якунланса, Доннарумма шу ёзда “Олд Траффорд” эгалари сафига кўчиб ўтиши мумкин.
Маълумот учун, Доннарумма ўтган мавсумда “ПСЖ” таркибида жами 47 ўйинда майдонга тушган, уларда 43 та гол ўтказиб юборган ва 17 учрашувда дарвозаси дахлсизлигини сақлаб қолган. Transfermarkt портали италиялик посбоннинг трансфер қийматини 40 миллион еврога баҳоламоқда.
Изоҳ (0)