Деҳлида сўнгги 20 йилдаги энг кучли ёмғирлар натижасида бир киши ҳалок бўлди, 15 та бино қулаб тушди, деб хабар бермоқда NDTV телеканали шаҳар ёнғин хавфсизлиги бошқармасига таяниб.
“Шанба куни шаҳарда кучли ёмғирдан сўнг 15 та уй қулаб тушди, бир киши ҳалок бўлди”, — дея ўт ўчириш хизмати вакилининг сўзларидан иқтибос келтирган телеканал.
Шунингдек, Деҳлининг энг муҳим бизнес ва тижорат ҳудудларидан бири — Коннат-Плейс сув остида қолиши сабабли пойтахт аҳолиси муаммоларга дуч келди. Маълумотларга кўра, атиги бир неча соатлик ёмғир шундай “даҳшатли вазиятга” олиб келган.
Шу ҳафта бошида Ҳиндистон радиоси Бихар штатида чақмоқ уриши ва кучли ёмғирлар таъсирида камида 12 киши ҳалок бўлганини хабар қилган эди. Ҳиндистон метеорология департаменти штатнинг бир қанча ҳудудларида кучли ёмғир давом этиши ҳақида огоҳлантирди, табиий офатларга қарши курашиш бўлими эса чақмоқ уриши хавфи туфайли одамларни ёмғир пайтида кўчага чиқмасликка чақирди.
Изоҳ (0)