Ҳиндистоннинг ғарбий Maxarаштра штатидаги машҳур сайёҳлик масканида дарё устидаги темир кўприк қулаши оқибатида камида 2 киши ҳалок бўлди, яна 32 киши жароҳат олди. Бу ҳақда CNN хабар берди.
Камида 6 киши қутқарилган ва оғир аҳволда шифохонага ётқизилган. Ҳодиса сўнгги бир неча кун ичида кучли ёмғирлар кузатилган Пуна туманидаги Кундамала ҳудудида содир бўлган.
Кўприк пикникчилар кўп бўладиган ҳудудда қулаб тушганда ёмғир ёғмаётган эди, деб хабар берилган. Полиция Табиий офатларни бартараф этиш миллий кучлари ва бошқа қидирув-тиклаш бўлинмалари гуруҳлари қутқарув ишларини олиб борганини маълум қилган.
Олдинроқ Ҳиндистон шимоли-шарқида сўнгги бир неча кун ичида кучли ёмғир, сув тошқини ва кўчкилар оқибатида камида 30 киши ҳалок бўлгани, минглаб одамлар жароҳатлангани ҳақида хабар берилганди.
Ҳиндистон армияси Сикким штатидаги ҳарбий лагерини кўчки босиши оқибатида 2 аскар ва бир нафар юк ташувчи ҳалок бўлгани, 6 аскар бедарак йўқолганини маълум қилган. Бедарак йўқолган олти кишини қутқариш ишлари олиб борилган. Шунингдек, Ассам, Арунчал Прадеш, Мегҳалая ва Мизорам штатларида ҳам қурбонлар қайд этилганди. Ассам штатида жами 17 та туман сув тошқинидан зарар кўрган. 364 мингдан ортиқ одам жароҳатланиб, улар учун 52 та ёрдам лагерлари ташкил этилганди.
Манипур штатида эса армия пойтахт Импҳал бўйлаб кенг кўламли қутқарув ишларини давом эттириб, кучли ботқоқланган ҳудудлардан 500 дан ортиқ тинч аҳолини эвакуация қилганди. Расмийлар Арунчал-Прадешда кўчкилар ва сув тошқинлари оқибатида 10 киши, Ассамда эса 8 киши ҳалок бўлганини айтганди.
Изоҳ (0)