Украиналик қочқинлар жанговар ҳаракатлар тугагунга қадар АҚШда қолишлари мумкин. Бу ҳақда Америка президенти Дональд Трамп журналистларга маълум қилди.
Журналистлар ундан Вашингтон украиналик қочқинларга жанглар тугагунча мамлакатда қолишга рухсат бериш ёки бермаслигини сўрашган.
“Биз буни амалга оширамиз. Бизда Украинадан келган кўплаб одамлар бор ва биз улар билан ҳамкорлик қилмоқдамиз”, дея жавоб берган АҚШ президенти.
Қайд этиш лозим, Трамп Оқ уйга қайтгач, муҳожирларга нисбатан қатъий сиёсат юритмоқда. У инаугурациядан сўнг дарҳол ўзидан олдинги президент Жо Байден томонидан жорий этилган “Украина учун бирдамлик” (United for Ukraine, U4U) қочқинларга ёрдам дастурини тўхтатиш тўғрисидаги фармонни имзолади.
Мазкур дастур украиналиклар ва уларнинг яқин қариндошларига молиявий ҳомийлар мавжуд бўлган тақдирда АҚШда икки йил қолиш имконини берарди. The New York Times бу дастурни “ҳал қилувчи” деб атади. Газетанинг маълумотларига кўра, 2023 йил сентябрь ойига келиб 150 мингдан ортиқ киши унинг иштирокчисига айланган.
Март ойида Reuters Трамп маъмурияти Байденнинг инсонпарварлик дастурлари доирасида АҚШга келган муҳожирларни мақомидан маҳрум қилиш бўйича кенг қамровли дастур доирасида тахминан 240 минг украиналикнинг вақтинчалик ҳуқуқий мақомини бекор қилишни режалаштираётгани ҳақида хабар берган эди. Оқ уй бу маълумотларни ёлғон деб айтди.
Май ойида The Washington Post ҳужжат лойиҳаларига асосланиб, Трамп маъмурияти қочқинларни, жумладан, 200 минг украиналикни депортация қилишни молиялаштириш учун хорижий ёрдам учун ажратилган 250 миллион долларгача маблағ сарфлашни режалаштираётгани ҳақида ёзди.
Изоҳ (0)