Ҳиндистон авиация регулятори (DGCА) Air India авиакомпаниясининг GЕnx двигателлари билан жиҳозланган барча Boeing 787-8 ва 787-9 самолётлари паркини кучайтирилган хавфсизлик текширувидан ўтказиш тўғрисида буйруқ чиқарди. Бу DGCА баёнотидан маълум қилинди.
Ҳужжатга кўра, кучайтирилган назорат чоралари 2025 йил 15 июндан бошлаб жорий этилади.
Ҳиндистондан ҳар бир парвоздан олдин лайнерларни текшириш ёқилғи ва тегишли тизимлар параметрларини текшириш, кабина компрессори ва унинг тизимларини кўздан кечириш, двигателни бошқариш тизимини электрон диагностика қилишни ўз ичига олиши керак. Бундан ташқари, двигателнинг ёнилғи актуаторини (босимни тартибга солувчи элемент) синовдан ўтказиш, мойлаш тизимини ва гидравлик тизимнинг созлигини текшириш ҳамда учиш параметрларини таҳлил қилиш зарур бўлади.
Буйруқда қайд этилишича, яқин икки ҳафта ичида двигателлар қувватини текшириш қўшимча равишда жорий этилади. Шунингдек, DGCА Boeing 787-8 ва 787-9 самолётларида сўнгги 15 кун ичида қайд этилган техник носозликларни таҳлил қилишни имкон қадар тезроқ якунлашни топширган.
12 июнь куни Лондонга AI171 рейсини бажараётган Boeing 787 ҳавога кўтарилиши биланоқ турар-жой ҳудудига қулаб тушди. Унинг бортида 242 киши - 230 йўловчи ва 12 экипаж аъзоси бўлган. Ҳалокат оқибатида фақат бир киши омон қолди, бортдаги қолган йўловчилар, экипаж аъзолари ва борт кузатувчилари ҳалок бўлди. Бундан ташқари, ерда ҳам қурбонлар бор, чунки самолёт талабалар ётоқхонаси томига қулади - жами 310 киши ҳалок бўлди.
Изоҳ (0)