Ҳиндистоннинг Аҳмадобод шаҳридан учган йўловчи самолёт шифокорлар ҳостелига бориб урилиб ҳалокатга учраган. Оқибатда 290 киши ҳалок бўлган. Бу ҳақда CNN хабар берди.
Суратларда самолётнинг думи бинодан чиқиб турганини кўриш мумкин. Ҳалок бўлганлар орасида ҳам самолётдаги, ҳам ердаги одамлар борлиги айтилган.
Ҳалокат оқибатида Аир Индиа авиакомпанияси самолёти бортида бўлган 242 кишидан жами 241 нафари ҳалок бўлди, дея хабар берган. Битта британиялик йўловчи омон қолгани айтилган.
Ҳалокатга учраган самолёт Boeing 787-8 Dreamliner эканлиги очиқланган. Boeing авиакомпанияси Аир Индиаъни қўллаб-қувватлашга тайёрлигини билдирган. Авиакомпания раҳбари Келли Ортберг бу ҳалокатдан сўнг, келаси ҳафта бўлиб ўтадиган Париж авиасалонида иштирок этиш режасини бекор қилган.
Ортбергнинг сўзларига кўра, компания АҚШ Транспорт хавфсизлиги миллий кенгаши ва Ҳиндистоннинг самолёт ҳалокатларини тергов бюросини бу иш тергови жараёнида тўлиқ қўллаб-қувватлайди.
Қуйидаги видеода самолёт ҳалокатидан кейин вайроналар остидан чиқиб кетаётган ягона тирик қолган шахс акс этган.
Аир Индиа воқеа юзасидан баёнот берди: “Самолёт бортида бўлган 242 кишидан биттасидан ташқари ҳаммаси ҳалок бўлган. Бортда 230 нафар йўловчи ва 12 нафар экипаж аъзоси бўлган. Йўловчиларнинг 169 нафари Ҳиндистон, 53 нафари Буюк Британия, 7 нафари Португалия ва 1 нафари Канада фуқароларидир”.
Ҳалокатдан омон қолган ягона киши 11А ўриндиқда ўтирган, келиб чиқиши ҳиндистонлик бўлган британиялик бўлиб, у ҳозирда шифохонада даволанмоқда. Вишваш Кумар Рамеш аҳволи “яхши” эканини билдирган. Унинг аҳволи “унчалик оғир эмас” ва яқин бир неча кун ичида қўйиб юборилиши мумкин, деди доктор Ражниш Пател.
Рамешдан ҳалокат ҳақида нималарни эслагани сўралганида, доктор унинг “жароҳатдан кейинги амнезия”дан азият чекаётганини айтган.
Ҳиндистон ҳукуматига кўра, ҳодисада Гужарот штатининг собиқ бош вазири Вижай Рупани вафот этгани тахмин қилинмоқда. Бундан ташқари ерда ҳам одамлар ҳалок бўлгани айтилган.
“Бош вазир Вижай Рупани ҳам ўша ерда бўлгани жуда ачинарли”, деди Ҳиндистон фуқаро авиацияси иттифоқи вазири Рам Моҳан Наиду Кинжарапу. Айтилишича, Бош вазир Нарендра Модининг Бхаратия Жаната партияси аъзоси Рупани 2016 йилдан 2021 йилгача Гужарот штатининг бош вазири бўлиб ишлаган.
Тирик қолган Вишваш Кумар Рамеш рейсда акасининг ёнида ўтирган эди, “Ҳа, ҳар ҳолда, оиласи Рамешнинг соғ-саломатлигидан хурсанд”, деди Англиядаги оила вакилидан бири Валги.
Британия парламенти аъзоси ҳалокатдан омон қолган ёлғиз инсоннинг оиласи билан суҳбатлашган.
“Бу мўжизадан бошқа нарса эмас. Мен уларнинг оиласига мурожаат қилдим. Билганингиздек, унинг қариндошидан бири ҳам ўша рейсда бўлган, афсуски, омон қолмаган”, деди парламенти аъзоси Шивани Ража.
Бутун дунё терговчилари 12 июнь куни ҳалокатга учраган самолёт билан боғлиқ вазиятда нима муаммо бўлганини аниқлаш учун текширувга жалб қилиниши айтилган.
АҚШ президенти Дональд Трамп 12 июнь куни Ҳиндистонда рўй берган авиаҳалокатдан хавотирда эканлигини билдириб, агар керак бўлса, АҚШ уни қўллаб-қувватлашга ваъда беришини айтган.
“Самолёт ҳалокати даҳшатли бўлган. Мен уларга аллақачон қўлимиздан нима келса, ёрдам беришимизни айтдим. Ҳиндистон катта ва кучли давлат, улар буни уддалашига ишончим комил. Мен уларга қўлимиздан нима келса, дарҳол етиб борамиз, деб айтдим”, деди Трамп.
Ҳиндистон тиббиёт ассоциацияси федерациясининг маълум қилишича, Аир Индиа самолёти бинога қулаганидан кейин 50 дан 60 гача талаба маҳаллий касалхоналарга ётқизилган. 4-5 нафар талаба бедарак йўқолган, яна 2-3 нафари жонлантириш бўлимидалиги билдирилган.
Лондоннинг Гатвик аэропортида ҳалокатга учраган самолёт йўловчиларининг қариндошлари учун қабулхона ташкил этилган. У жабрланганларнинг қариндошларига маълумот ва ёрдам беради.
“Консуллик ёрдамига муҳтож бўлган ёки дўстлари ёки оиласи ҳақида хавотирда бўлган Британия фуқаролари 020 7008 5000 рақамига қўнғироқ қилишлари мумкин”, дейилади аэропортнинг ижтимоий тармоқлардаги саҳифасида.
Изоҳ (0)