Президент Шавкат Мирзиёев Аҳмадободда юз берган авиаҳалокат оқибатида кўплаб инсонлар ҳалок бўлгани ва жиддий жароҳат олгани муносабати билан Ҳиндистон президенти Драупади Мурму ва бош вазири Нарендра Модига таъзия мактуби йўллади. Бу ҳақда Президент матбуот хизмати хабар берди.
Давлат раҳбари қурбон бўлганларнинг оила аъзолари ва яқинларига, бутун Ҳиндистон халқига чуқур ҳамдардлик изҳор этди, жароҳат олганлар тез фурсатда соғайиб кетишини тилади.
Аввалроқ Буюк Британияга йўл олган ҳаво кемаси бортида 242 киши борлиги ҳақида хабар берилганди. Авиация парвозларини кузатиб борувчи Flightradar24 порталига кўра, ҳалокатга учраган самолёт Boeing 787-8 Dreamliner бўлиб, ушбу кейс бу моделдаги фуқаро лайнерлари билан юз берган илк ҳалокатдир. Дастлабки маълумотларга кўра, бортда бўлганларнинг 169 нафари Ҳиндистон, 53 нафари Буюк Британия, яна 7 киши эса Португалия фуқароларидир.
Воқеадан кўп ўтмай, ҳалокат жойидан олинган кадрлар эълон қилинди. Унда ўт ўчирувчилар воқеа жойига етиб келиб, самолёт қолдиқлари ҳамда ён-атрофдаги автомобилларга туташган ёнғинни бартараф этаётганини кўриш мумкин. Air India самолёт шифохона биносига қулаганини маълум қилди. Ярадорлар шифохонага олиб кетилди.
Ҳиндистонда сўнгги авиаҳалокат 2020 йили Air India Express билан юз берган эди. Ўшанда Air India’нинг арзон рейслар билан шуғулланувчи шўба корхонасига тегишли Boeing-737 самолёти қулаб, 21 кишини ҳаётдан олиб кетган эди.
Изоҳ (0)