4 апрель куни Самарқанд халқаро иқлим форумининг ялпи сессияси бўлиб ўтди. Унда Марказий Осиёдаги экологик муаммоларга тўхталиб ўтилди. Тадбирда Шавкат Мирзиёев нутқ сўзлади.
Президент иқлим ўзгариши муаммолари озиқ-овқат ва энергия хавфсизлиги билан чамбарчас боғлиқлигини, минтақа аҳолиси 25 йилдан сўнг 100 миллион кишидан ортиши кутилаётган бир вақтда унумдор ерлар тез суръатлар билан қисқариб бораётганини қайд этди.
Унинг қайд этишича, бугунги кунда минтақадаги жами ер майдонининг 20 фоиздан ортиғи деградацияга учраган. Чорак асрдан сўнг ҳосилдорлик учдан бир қисмга камайиши мумкин.
Шу муносабат билан, ўрмон хўжалиги ва аграр соҳанинг мослашувчанлигини ошириш, шунингдек, ‘Уфқ—Европа’ дастури доирасида озиқ-овқат хавфсизлигини мустаҳкамлаш учун илмий салоҳиятимизни бирлаштириш ҳаётий муҳим масала, деб ҳисоблайман, деди президент.
Президент Ўзбекистонда деградацияга учраган ер майдонларини қисқартириш ва иқлим ўзгариши оқибатларини юмшатиш учун “Яшил макон” лойиҳаси доирасида кенг кўламли кўкаламзорлаштириш ишлари олиб борилаётганини, Оролбўйининг 2 миллион гектардан ортиқ чўл ҳудудларида қурғоқчиликка чидамли ўсимликлар экилганини айтди.
Шавкат Мирзиёев ҳар йили Наврўз байрами арафасида дарахт экиш бўйича “Марказий Осиёнинг яшил белбоғи” минтақавий акциясини ўтказишни таклиф этди.
“Дарё” мухбири мазкур тадбирда қатнашиб, турли давлатлардан ташриф буюрган иштирокчилар билан суҳбатлашди.
“15 йилдан бери Ҳиндистон чўлларида сувни тежаш бўйича бир қатор лойиҳаларни амалга ошириб келмоқдаман. Ушбу лойиҳалар натижасида қуриб қолган кўл ва дарёлар қайта тикланмоқда. 15 йил ичида 23 та дарёни қайта тиклашга муваффақ бўлдик. Бу эса қишлоқ хўжалиги ривожига катта ёрдам бермоқда.
Ўзбекистонда ҳам авваллари дарё ва кўллар кўп бўлган. Афсуски ҳозирга келиб уларнинг кўплари қуриб қолди. Биргина Орол денгизининг қуриши қандай салбий оқибатларга олиб келмоқда. Бундай фожиаларнинг олдини олиш учун қишлоқ хўжалигида сувдан оқилона фойдаланиш керак. Сувни йиғиш технологиясини жорий этиш ва ундан самарали фойдаланиш чораларини қўллаш керак. Мана шу икки омил сувни асрашда жуда муҳим ҳисобланади”, деди ҳиндистонлик мутахассис Ражендра Сингх.
“Мен Тоттори университетида ишлайман. Сувни тежаш бўйича JICA лойиҳасида қатнашаман. Бугунги тадбирдан жуда катта таассуротлар олдим. Биз Нукус ва Самарқанд давлат университетларида сувни тежаш бўйича бир қатор лойиҳаларни йўлга қўйганмиз. Бу лойиҳаларимиз самара беришига, минтақа иқлимини муҳофаза қилишга ўзига хос ҳисса қўшишига ишончим комил”, деди япониялик профессор Харуюки Fujiмаки.
“Самарқандда бўлиб ўтаётган мазкур тадбир жуда ҳам долзарб. Иқлим ўзгариши муаммоларини ҳал қилиш минтақангиз келажаги учун жуда муҳим. Бугунги кунда Марказий Осиё мамлакатлари яшил энергетикадан фойдаланишга ўтаётгани жуда қувонарли. Бу нафақат мазкур минтақада, балки қўшни минтақаларда ҳам экологияни муҳофаза қилишга катта ёрдам бериши аниқ. Марказий Осиё мамлакатлари бу мақсадга эришиш учун биргаликда ҳаракат қилаётгани жуда яхши ҳолат”, деди туркиялик Гурбюз Гунел.
Изоҳ (0)