Ўзбекистон президентининг 2025 йил 27 мартдаги қарори билан учта халқаро шартномани тасдиқлади.
Булар:
- 2024 йил 23 сентябрь куни Нью Йоркда имзоланган Ўзбекистон билан Португалия ўртасида иқтисодий ҳамкорлик тўғрисидаги битим;
- 2024 йил 24 сентябрь куни Нью Йоркда имзоланган Ўзбекистон ҳукумати билан Словакия ҳукумати ўртасида иқтисодий ҳамкорлик тўғрисидаги битим;
- 2024 йил 27 сентябрь куни Тошкентда имзоланган Ўзбекистон ҳукумати билан Ҳиндистон ўртасида икки томонлама инвестиция битими.
Инвестиция, саноат ва савдо вазирлиги мазкур халқаро шартномаларни амалга ошириш учун масъул этиб белгиланди. Вазирлар Маҳкамаси ҳамда тегишли вазирлик ва идораларнинг раҳбарлари мазкур халқаро шартномалар кучга кирганидан кейин белгиланган тартибда уларнинг қоидалари амалга оширилиши устидан назоратни таъминлайди.
Ўзбекистон билан Португалия ва Словакия ўртасида иқтисодий ҳамкорлик тўғрисидаги битимлар икки давлат ТИВ раҳбарлари томонидан имзоланганди. Бахтиёр Саидов ушбу ҳужжат савдо ва инвестициявий ҳамкорликни сезиларли даражада мустаҳкамлашга ёрдам беришини айтганди. Вазир Ўзбекистон билан Словакия ўртасида иқтисодий ҳамкорлик тўғрисидаги битим ишбилармонлик алоқалари, савдо-сотиқни ривожлантириш ва қўшма лойиҳалар икки томонлама муносабатларни ривожлантиришда янада сезиларли натижалар беришини таъкидлаганди.
Ўзбекистон ҳукумати билан Ҳиндистон ўртасида икки томонлама инвестиция битими эса икки давлат бизнес-форуми доирасида Ўзбекистон бош вазири ўринбосари Жамшид Хўжаев ва Ҳиндистон молия вазири Нирмала Ситҳараман томонидан имзоланганди. Ушбу ҳужжат халқаро амалиёт доирасида ўзбекистонлик инвесторларнинг Ҳиндистонда ва ҳиндистонлик инвесторларнинг Ўзбекистонда муносиб ҳимоя қилинишини кафолатлайди.
Изоҳ (0)