Президент Шавкат Мирзиёев Standard Chartered, International Hospitals Group, LVMH, Airbus каби Европанинг қатор етакчи компаниялари раҳбарларини қабул қилди. Бу ҳақда Президент матбуот хизмати хабар берди.
Давлат раҳбари форумда Европа давлатларидан иштирокчилар сонининг кўпайгани томонлар иқтисодий ва инвестициявий ҳамкорликни кенгайтиришдан манфаатдор эканидан далолатлигини таъкидлади. Европа мамлакатлари билан товар айирбошлаш ҳажми, қўшма корхоналар сони ва инвестициялар портфели кўпайиб бораётгани мамнуният билан қайд этилди. Фаол маданий-гуманитар, таълим ва туризм алмашинувлари йўлга қўйилган.
Standard Chartered компанияси раҳбари Саиф Малик билан кичик бизнес ва инфратузилма лойиҳаларини молиялаштириш, шунингдек, Ўзбекистон банклари томонидан янги кредит линияларини ўзлаштириш бўйича шерикликни кенгайтириш истиқболлари кўриб чиқилди.
International Hospitals Group бошқаруви раиси Честер Кинг билан клиника қуриш режалари, шунингдек, Ўзбекистондаги кўп тармоқли тиббиёт марказларини давлат-хусусий шериклик асосида бошқариш масалалари муҳокама қилинди.
Tashkent City’да LVMH флагман дўконини очишни тезлаштириш муҳимлиги қайд этилди. Шунингдек, Ўзбекистондаги ипак ва табиий хом ашё ишлаб чиқарувчиларни компаниянинг таъминот занжирига киритиш имкониятлари муҳокама қилинди.
Airbus компаниясининг Европадаги президенти Йохан Пелисе билан суҳбатда авиация соҳасидаги шерикликни кенгайтириш истиқболларига алоҳида эътибор қаратилди. Узоқ муддатли Ҳамкорлик дастурини қабул қилиш муҳимлиги таъкидланди.
Европа компаниялари раҳбарлари Ўзбекистон президентига самимий қабул ва мамлакатимизда хорижий инвесторлар учун яратилган қулай шароитлар учун миннатдорлик билдирди. Иқтисодиётнинг устувор тармоқларида муҳим лойиҳа ва дастурларни амалга оширишда бундан буён ҳам иштирок этишга тайёрлигини билдирди.
Шавкат Мирзиёев, шунингдек, Euronews медиа холдинги директорлар кенгаши раиси Педро Варгасни ҳам қабул қилди.
Ушбу етакчи компания билан ҳамкорликни ривожлантириш, жумладан, Euronews’нинг кенг аудиториясини Ўзбекистоннинг бой маданий-тарихий мероси, мамлакатда рўй бераётган муҳим сиёсий-иқтисодий жараёнлар, шунингдек, унинг инвестицион ва туризм салоҳияти тўғрисида хабардор қилиш масалалари кўриб чиқилди.
Давлат раҳбари қўшма ахборот лойиҳаларини амалга ошириш ва профессионал кадрлар тайёрлаш борасидаги фаол саъй-ҳаракатларни, шунингдек, Euronews Тошкент шаҳрида ўз офисини очишни режалаштираётганини олқишлади.
Euronews Аcаdemy дастури доирасида ўзбекистонлик журналистларни илғор профессионал стандартлар асосида ўқитиш режалари қўллаб-қувватланди.
Барча истиқболли йўналишлар бўйича тизимли ишларни ташкил этиш мақсадида қўшма “йўл харитаси”ни тайёрлашга келишиб олинди.
Изоҳ (0)