Президент Шавкат Мирзиёев тўртинчи Тошкент халқаро инвестиция форумида нутқ сўзлади. Бу ҳақда Президент матбуот хизмати хабар берди.
Давлат раҳбари “Янги Ўзбекистон – инвестициялар учун катта имкониятлар мамлакати” деган тамойил амалий натижаларга айлантириш мақсадида барча чоралар кўрилаётганини айтди.
“Энг аввало, бир нарсага эътиборингизни қаратмоқчиман: глобал ишлаб чиқариш занжирларида ҳар бир давлат учун тенг шароитни таъминлайдиган ишончли қоидалар бўлиши шарт ва зарур. Ҳеч шубҳасиз, бу борада Жаҳон савдо ташкилотининг алоҳида ўрни бор. Шу боис, келгуси йилда ушбу Ташкилотнинг аъзосига айланиш бўйича олдимизга мақсад қўйганмиз ва бу борада ҳамкорларимиз билан фаол ишлаяпмиз. Бунинг учун ўнлаб қонун, юзлаб стандартларни халқаро талабларга мослаштирдик ва бу ишларни шу йил тўлиқ якунига етказамиз”, деди президент.
Ўзбекистон етакчиси мамлакатда хорижий сармоядорларга яна-да қулай муҳит яратиш учун маҳаллий компаниялар билан бир хил шароитларни кафолатловчи “миллий режим” жорий қилинишини таъкидлади. Шу билан бирга, давлат органлари билан муносабатга киришишда “ягона дарча” тамойили татбиқ этилиши белгиланди, инвестиция фаолиятини ортиқча текширувлардан кафолатли ҳимоялаш тизими яратилади.
“Булар орқали 2030 йилга бориб, Ўзбекистоннинг кредит рейтингини “инвестицион” даражага олиб чиқишни мақсад қилиб қўйганмиз.
Учинчидан, биз давлат компанияларини хусусийлаштиришда уларни юртимиз фаровонлигига хизмат қилувчи йирик активларга айлантириш йўлини танлаганмиз. Шу боис, 18 та йирик компания ва банклардаги қарийб 2 миллиард долларлик давлат улушини ўзида бирлаштирган “Миллий инвестиция жамғармаси” ташкил этилди. Жамғарма бошқарувига нуфузли “Франклин Темплетон” компанияси жалб қилинди. Келгуси йилнинг ўзида жамғарманинг акциялар пакети халқаро IPO га чиқарилади.
Шунингдек, профессионал консултантлар жалб қилиниб, икки йилда 29 та йирик давлат компанияси хусусийлаштирилади”, дейди Ўзбекистон президенти.
Шавкат Мирзиёев транспорт ва логистика соҳаси Ўзбекистон иқтисодиётининг қон томири сифатида кўрилишини билдирди.
“Шу боис, бу соҳага ҳам хусусий капитални фаол жалб қилмоқдамиз. Биргина мисол, Самарқанд, Наманган, Бухоро ва Урганч халқаро аэропортлари давлат-хусусий шериклик асосида салоҳиятли инвесторлар бошқарувига берилди. Урганч аэропорти бошқарувига дунёнинг етакчи “Инчон” компанияси жалб қилинди. Келгуси йилда Нукус, Термиз, Фарғона, Навоий аэропортлари бўйича ҳам тендерлар ўтказамиз.
Яна бир муҳим йўналиш – пойтахтимизда яшаб ва ишлаётган аҳоли сони 5 миллиондан ошди. Шу боис, 2 миллион аҳолига мўлжалланган “Янги Тошкент” шаҳрини барпо этиб, пойтахтни мегаполисга айлантирамиз”, дейди давлат раҳбари.
Президент “Янги Тошкент”га йилига 20 миллион йўловчига хизмат кўрсатиш имкониятига эга аэропорт, темир йўл ва автомобиль транспортини қамраб олган “мултимодал хаб” қурилишини айтди. Қўшимча қилинишича, йирик савдо комплекслари ва молия марказлари қад кўтаради.
“Ушбу мега лойиҳани биргаликда амалга ошириш учун инвесторлар, халқаро молия институтлари ва хорижий банкларни таклиф қиламиз.
Бешинчидан, сўнгги йилларда қўшниларимиз билан йўлга қўйилган очиқ ва дўстона сиёсат натижасида Марказий Осиёда мутлақо янги ҳамкорлик муҳити шаклланди. Бугун ушбу давлатларнинг ҳукумат раҳбарлари форумда иштирок этаётгани ҳам сўзимнинг яққол исботидир.
Эътибор беринг, саккиз йилда қўшниларимиз билан товар айланмаси ҳажми 3,5 баробардан зиёд ошиб, қарийб 13 миллиард долларга етди. Катта инвестиция лойиҳалари амалга оширилмоқда. Жумладан, Хитой – Қирғизистон – Ўзбекистон темир йўлини қуришни бошладик, йирик энергетика ва инфратузилма лойиҳаларини тайёрлаш бўйича салмоқли ишлар қилинмоқда. Умуман, биз Марказий Осиёда “Инвестиция ва савдо учун яхлит ҳудуд концепцияси”ни илгари суришни таклиф қиламиз”, деди президент Шавкат Мирзиёев.
Изоҳ (0)