Ўзбекистонга йил бошидан буён 1 тоннадан ортиқ гиёҳванд моддалар олиб кирилиши олди олинди. Бу ҳақда Божхона қўмитаси матбуот хизмати хабар берди.
Маълум қилинишича, 2024 йилда божхона органлари томонидан 1 тоннадан зиёд гиёҳвандлик воситалари, 554 минг дона психотроп ва кучли таъсир этувчи моддалар, 49 дона қурол, 3010 та ўқ-дорилар ашёвий далил сифатида олинди. Хусусан, декабрь ойи ўрталарида “Ғишткўприк” чегара божхона постида 16 дона қадоқда 2 800 дона 5,5 мм калибрли пневматик қурол ўқлари ноқонуний олиб кирилишига чек қўйилганди.
Сентябрьда Россиядан келган фуқаро Ўзбекистонга ўқотар қуролни яширинча олиб кирмоқчи бўлганди.
Амалдаги қонунчиликка кўра, фуқаровий ва хизмат қуролини ҳамда унинг ўқ-дориларини Ўзбекистон ҳудудига олиб кириш, олиб чиқиш ва транзитини амалга оширишда, тегишли органлар рухсатномаларига кўра амалга оширилади.
Қўмита маълумотига келтирилишича, якунига етаётган йилда9 мингга яқин ҳолатда 914 миллиард сўмлик товарлар, 35 миллиард сўм эквивалентидаги валюта қимматликлари, 76 миллиард сўмлик заргарлик буюмлари, 63 миллиард сўмлик тамаки маҳсулотларининг ноқонуний айланувига чек қўйилди.
Шунингдек, 17 мингга яқин ташқи иқтисодий фаолият қатнашчиларига божхона тўловларидан 49,6 триллион сўмлик имтиёз ва преференсиялар қўлланилди, 6,6 триллион сўмлик божхона тўловларини кечиктириб тўлашга рухсат берилди.
“Божхона ҳудудида қайта ишлаш” режимини оммалаштириш орқали ушбу режимидан фойдаланаётган тадбиркорлар сони 350 тага етказилиб, қайта ишланган товарлар экспорти бир йилнинг ўзида 42 фоизга ёки 305 миллион долларга кўпайиб, 1 миллиард долларни ташкил этди.
Давлат бюджетига ундирилган божхона тўловлари ўтган йилга нисбатан 8 фоизга ошишига эришилди.
Изоҳ (0)