Совуқ мавсумда эътибордан четда қолмаслиги керак бўлган бир нечта макияж қоидалари мавжуд, деб ёзади Marie Claire.
Ёзда жазирама, қишда эса совуқ ҳаво тери ва макияж учун ҳақиқий синовдир. Агар ёзда муаммо косметиканинг том маънода юзда эриши бўлса, қишда вазият янада мураккаблашади. Бир вақтнинг ўзи бир нечта муаммолар пайдо бўлади: тери қурийди, туш оқади, юз териси қизаради. Шунинг учун макияж қилишдан аввал қуйидаги қоидаларга амал қилиш тавсия этилади.
«Озиқлантириш» режими
Қишда тональ кремдан фойдаланиш ҳатто ёғли тери эгалари учун ҳам муаммога айланади. Сабаби тери қуриши, пилинг ва қизаришдир. Шунинг учун намлантирувчи ва озиқлантирувчи асосли тональ кремари ёрдамга келади. Чунки қишда тери ҳар доим сувсизланиш ёқасида бўлади. Бу совуқ туфайли эмас, балки ҳароратнинг кескин фарқи туфайли юз беради.
Иситувчи қатлам
Озиқлантирувчи тональ крем қўллагандан сўнг унинг устидан упа суртиш мумкин. Бу тери ва ташқи таъсир ўртасида ўзига хос иссиқ қатлам ҳосил қилади, шу билан терига қулайлик яратади ва макияж мустаҳкамлигини таъминлайди.
Қизаришни ниқоблаш
Агар юзнинг баъзи жойлари совуқда қизариб кетса, уларни яшириш учун консилердан фойдаланиш мумкин. Буни, албатта, тональ кремдан олдин қўллашни унутмаслик лозим.
Кўзлар учун махсус макияж
Кўзларни бўяш ҳам қиш мавсумининг жуда асосий мавзусидир. Шамол ва совуқдан кўпчиликда кўзлар ёшланади. Шунинг учун, қишда, кўзни бўяш учун сувга чидамли бўлган гўзаллик маҳсулотларини олиш керак. Бу турдаги туш ҳам фақат сув билан ювилади, унинг ҳарорати 38 даражадан юқори бўлиши керак. Гелга асосланган кўз қалами ҳам совуққа бошқаларга қараганда яхшироқ бардош беради.
Лабларни намлантирувчи воситалар
Қишда, лабларга блеск суртиш тавсия этилмайди ва улар нозик терини совуқдан ҳимоя қилмайди. Энг яхши ечим намлантирувчи таркибга эга лаб бўёғига ўтишдир. Умуман олганда, яхши лаб бўёғи бутун қиш учун ҳақиқий қутқарувчи бўлиши мумкин. Бальзамлар таркибида нафақат ёғлар, балки терини даволовчи, ҳимоя қилувчи ва силлиқлаштирувчи мумлар ҳам мавжуд. Шунингдек, улардан фақат лаблар учун эмас, ёноқлар учун ҳам фойдаланиш мумкин. Совуқда қизарган ёноқларга бальзам қўллаш тери юзасидаги қизаришни бартараф этишга ёрдам беради.
Изоҳ (0)