Севимли лаб бўёғи хира кўринишни бошладими? Намлантирувчи кремлар юзда қичишишни пайдо қиляптими? Бу улардан фойдаланиш вақти туганини англатиши мумкин. Бир неча йил олдин Британиянинг «Escentual.com» агентлиги аёллар ўз косметикасини қандай сақлашлари ҳақидаги маълумотларни эълон қилди. Маълум бўлишича, баъзилар яроқлилик муддати ўтганидан 6 йил ўтиб ҳам севимли маҳсулотлари билан хайрлашмайди ва сўровда қатнашганларнинг 70 фоизи ҳеч қачон макияж чўткаларини ювмаган, деб ёзади Marie Claire.
Терини парвариш қилиш ─ ёрлиқ билан танишиб чиқинг
Шуни эсда тутиш керакки, терида юзага келадиган барча реакциялар, кейин организмда давом этади. Бундан ташқари, агар барча фаол моддалар ёмонлашган бўлса, унда ўн босқичли терини парвариш қилиш тартибига сарфлаган икки соат вақт беҳуда бўлиши мумкин. Тахмин қилиш ўрнига, махфий белгиларни ўқишга ҳаракат қилиш лозим.
Маҳсулотнинг очилиш санасини белгилаш керак — вақт жуда ҳам тез ўтади; агар маҳсулот банкада бўлса, бармоқлар билан эмас, балки чўтка ёки пахтадан фойдаланиш лозим. Агар маҳсулотни қўллагандан кейин тери ачишса ёки қичиса, дарҳол ювиб ташлаш керак. Маҳсулотнинг ранги, ҳидида бирор нарса ўзгарса, ундан халос бўлган яхши.
Тональ крем ва консилер воситалари ─ 1 йил
Суюқ тональ крем ва консилерлардан фойдалана бошлангандан кейин бир йил ўтгач, уларни тарк этиш керак. Шиша қадоқни ёруғликда ушлаб туриш керак, агар ёғ юзага кўтарилса, унда тональ кремни ўзгартириш вақти келган. Тональ кремлар абадий фойдаланиш учун мўлжалланмаган. Упа билан эса бироз бошқача: у икки йилгача яхши сақланиши мумкин, чунки бактериялар қуруқ муҳитда суюқда бўлгани каби тез кўпаймайди. Аммо вақт ўтиши билан ҳатто бундай маҳсулотлар ҳам тузилмасини ўзгартиради: улар қаттиқлашади, парчалана бошлайди.
Румяна ва бронзаторлар ─ 2 йил
Бундай узоқ вақт сақланишининг сабаблари упа билан бир хил — сув муҳитининг йўқлиги, бу бактерияларнинг кўпайиши учун ёмон шароитларни билдиради. Иложи бўлса, ўсимлик экстрактлари бўлган маҳсулотларни танлаш керак — алоэ, кўк чой, мойчечак экстракти. Бу фойдали ҳамда ёқимли. Бироқ макияжда эҳтиёт бўлиш лозим. Румяна ҳамда бронзаторлардан фойдаланганда терига бир текисда сингмаса ёки ачишишни келтириб чиқарса, уларни салфетка ёрдамида артиб ташлаш мумкин.
Туш ─ 3-6 ой
Кундалик тушлар учун 3, баъзида суртиладиганидан эса 6 ой давомида фойдаланиш мумкин. Қоронғи ва нам чўтка бактериялар учун ажойиб макон эканини тушуниш учун академик бўлиш шарт эмас. Бразилия университети тадқиқотлари шуни кўрсатдики, вазиятни таҳлил қилиш учун аёллардан олинган косметик намуналарнинг 79 фоизи гўзаллик маҳсулотларига қараганда кўпроқ бактериал турар-жойларга ўхшайди. Афсуски, юқоридаги муддат тугагандан сўнг севимли тушни ташлашга тўғри келади.
Подводка ─ 3-4 ой
Бу фаол фойдаланувчилар учун максимал рухсат этилган муддат, чунки принципиал жиҳатдан вазият тушдан фарқ қилмайди. Подводканинг фаол ва хавфсиз муддати ҳам тўрт ой. Маҳсулотнинг қотиб қолиши ҳам унинг муддати ўтганининг белгисидир.
Лаб бўёғи ва блеск ─ 2 йил
Бу ерда бактериялар таҳдид солмайди. 24 ой ҳеч нарса ҳақида ташвишланмаслик мумкин. Воз кечиш учун ягона сигнал лабларда бўёқнинг нотекис тақсимланиши. Айтганча, лаб бўёғини бошқалар билан бўлишиш ҳам яхши эмас. Чунки бу билан лаб бўёғи чинакамига бактерия ташувчисига айланади.
Макияж чўткалари ─ тахминан 5-7 йил
Пардоз воситалари узоқ умр кўради. Тўғри парвариш туфайли муддатни янада узайтириш мумкин. Шунинг учун имкон қадар ҳар икки ҳафтада чўткаларни ювиб туриш керак. Кўзни бўяш учун ишлатиладиган чўткаларни ҳар фойдаланишдан кейин ювиш тавсия этилади. Бунинг учун керак бўлган нарса — илиқ сув ва совун.
Изоҳ (0)