Ҳар куни ойна қаршисида макияж якунлангач, унга путур етказувчи бир қанча кичик муаммолар кўзга ташланади. Улар арзимасдек туюлса-да, сезиларли ва ҳатто хунук кўриниши мумкин. Энг кенг тарқалган қуйидаги 10 муаммони бартараф этиш чораларини кўриб чиқиш вақти келди.
Лаб бўёғини тишларга тегиб қолиши
Ёрқин лаб бўёғи билан ҳар ким ўзини худди юлдуздек ҳис қилиши табиий. Аммо атрофдаги инсон томонидан «Тишингиздаги лаб бўёғини артинг» қабилидаги гапни эшитиш кайфиятни тушириб юборади. Шунинг учун лаб бўёғи сурилгандан сўнг, қоғоз салфетка ёки кафтга бўлса ҳам лабни бир маротаба босиш керак. Натижада лаб юзасидаги ортиқча бўёқ бартараф этилади ва ноқулайликлар келтириб чиқармайди.
Кўз остига тень кукунларининг тушиши
Одатда тональ креми ва упа сурилгандан сўнг кўзга ишлов бериш навбати келади. Қанчалар сифатли ёки ёғли тен бўлмасин, у кўз соҳаси пастига ёки бурун устига ёпишиши ҳам мумкин. Буни пахта ёстиқчасида ўчириш эса тональ крем ва упа сурилган юзни икки хил кўринишига олиб келади. Шунинг учун юз пардоздан ҳоли вақтида кўзларга оро бериш керак. Учиб тушган бўёқ кукунларини пардозсиз юздан тозалаб олиш осон кечади.
Тональ кремининг юзда бир текисда ёйилмай қолиши
Агар тональ кремидан аввал фойдаланилган воситани ранги тўғри танланган бўлса, муаммо фақат ортиқча ёки бир меъёрда сурилмаган тональ кремида бўлади. Аммо шунда ҳам юзни ювиб ташлашга шошилмаслик зарур. Бўяниш ёстиқчасини намлаб, ортиқча кремларни артиш ёки ёйиб ташлаш мумкин. Фақат бунинг учун бироз кўпроқ вақт кетади.
Қовоқларда тенларнинг тўпланиб қолиши
Қалин қатлам қилиб сурилган тенлар фақат бир неча соатгина чиройли кўриниши мумкин. Кейинчалик қовоқ бурмаларига ўрнашиб тўпланиб қолади. Бу муаммони бартараф этишда гел асосли падводка ёрдамга келади. Ишониш қийин, аммо иш бериши аниқ. У аввал қовоқ юзасига сурилади. Устидан тўқ рангдаги тен қопланади. Натижада кун давомида аввалги муаммо ҳақида бош қотиришнинг кераги ҳам бўлмайди.
Тушнинг кўз атрофида ёйилиши
Ушбу ҳолатни айниқса, куннинг охирида кўпчиликнинг пардозида кўриш мумкин. Чарчоқ ва терлаш туфайли туш бўёғи кўз остида қора доғларни пайдо қилади. Бу вақтда аввало, тушдан фойдаланиш уч ойдан ошмаган бўлиши керак. Агар ҳаммаси жойида бўлса, киприкларни бўяшда икки-уч маротаба туш суриш керак, ундан ортиқ эмас. Визажистларнинг яна бир сири шундаки, пастки киприкларга умуман туш суришнинг ҳожати йўқ.
Лаб бўёғини чегара бўйлаб суриш
Лаб бўёғи қанчалар эҳтиёткорлик билан сурилмасин, тез фурсатда чегарадан ташқарига ёйилиб кетиши мумкин. Бунинг учун махсус восита «праймер» билан дўстлашиш керак. Лаб бўёғидан фойдаланишдан аввал ушбу восита сурилса, бўёқ ҳеч қаерга ёйилиб кетмайди.
Юз териси ва бўйин орасидаги фарқ
Юз терисига соатлаб пардоз бериш ва бўйинни эътиборсиз қолдириш ҳар бир аёл йўл қўядиган камчиликдир. Воситани тежаш фикрини бир четга суриш ва бўйин учун ҳам тонал креми ва упадан фақат оз миқдорда фойдаланиб, орадаги фарқни йўқотиш мумкин.
Қовоқларга тушнинг сурилиб кетиши
Барча пардоз ишлари якунланишига бир қадам қолганида киприкларга туш суриш бошланади. Афсуски, тен билан бўялган қовоқнинг юқори қисмига тегиб қолган тушни жуда эҳтиёткорлик билан тозалаш ҳам барчасини чиппакка чиқаради. Шунинг учун соҳа мутахассислари тушдан фойдаланишда кўзларни катта очиш эмас, аксинча ярим шаклда очишни тавсия этади.
Косметик воситалардан кейин юзнинг ялтираши
Барчаси қоидага кўра бажарилса-да, юз ялтираб қолиши яхши эмас. Бунинг учун яна «праймер» ёрдамга келади. Юзга сурилган намлантирувчи ёки озиқлантирувчи кремдан сўнг ундан фойдаланиш, 15 дақиқадан кейин тонал кремини суриш керак. Тональ крем юзасидан ҳам бироз юпқа қатламда «праймер» суриш зарар қилмайди. Шунда макияжни бўрттириб юборувчи упага мурожаат қилишнинг кераги бўлмайди.
Юзни ортиқча қизартириш
Нотўғри сурилган румяна воситаси юзни ҳаддан ортиқ қизаришига олиб келади. Бу дастлаб ойна қаршисида билинмаслиги мумкин, аммо кейинчалик кулгили кўринади. Бунга йўл қўймаслик учун румянанинг крем ёки упа кўринишидагисидан фойдаланиш мумкин. Шунингдек, уларни яноқнинг бироз юқори қисмига қўллаш керак.
Изоҳ (0)