Исроил парламенти (Кнессет) БМТнинг фаластинлик қочқинларга ёрдам кўрсатиш агентлигини “террорчи ташкилот” деб эълон қилиш учун овоз бермоқчи. Бу ҳақда The Jerusalem Post хабар берди.
“Ушбу қонун лойиҳасининг мақсади UNRWA’ни террорчи ташкилот деб эълон қилиш, шунингдек, Исроилнинг агентлик билан бевосита ёки билвосита алоқаларини тўхтатишга қаратилган”, — деб ёзади Исроил Бейтену партияси депутати Юлиа Малиновская.
Қонунчилик ташаббуси Халқаро жиноий суд ва умуман халқаро ҳамжамият Исроилни Ғазога инсонпарварлик ёрдамининг кириб келиши ва тарқатилишини етарли даражада таъминламагани учун жавобгарликка тортган пайтда амалга оширилмоқда.
UNRWA Сурия, Ливан, Иорданиядаги фаластинликлар ҳамда Ғазо ва Ғарбий Соҳилдаги яна 2,34 миллиондан ортиқ қочқин учун хизмат кўрсатади.
Фақат охирги 2,34 миллион фаластинлик Кнессет учун овоз бериш жараёнида аҳамиятли, дейилади хабарда. Қонун лойиҳаси агар дастлабки овоз бериш йўли билан маъқулланса, барибир биринчи, иккинчи ва учинчи ўқишдан ўтиши керак бўлади.
Исроилнинг UNRWA’ни ёпишга бўлган кўп йиллик истаги Ғазодаги уруш билан кучайди. Жумладан, Исроил UNRWA’нинг 12 га яқин ходимини 7 октябрь ҲАМАС бошчилигидаги Исроилга бостириб кириши чоғида фуқароларни ўғирлашда иштирок этганликда айбламоқда.
Бундан ташқари, UNRWA’нинг 190 га яқин ходими ҲАМАС билан алоқаси борлиги даъво қилинган. Исроил армияси агентликнинг Ғазодаги объектларида ҲАМАС қуроллари сақланганини таъкидлаган.
“Кўплаб давлатлар, жумладан, АҚШ, Германия, Канада, Австралия, Италия, Буюк Британия, Финляндия ва Руминия UNRWA’ни молиялаштиришни тўхтатиш қарорини эълон қилган”, — дейди Малиновская.
Изоҳ (0)