Исроилда октябрь ойида бўлиб ўтиши керак бўлган муниципалитет сайловлари Ғазо секторида давом этаётган ҳарбий амалиёт туфайли яна қолдирилди.
Вазирлар Маҳкамасининг ҳафталик йиғилишида маҳаллий сайловларни 2024 йил 27 февралга кўчиришга қарор қилинди.
Бу қарор армия билан маслаҳатлашувлар натижасида қабул қилинди. Жанговар зонада жойлашган 688 нафар заҳирадаги аскар 144 та муниципалитетдаги сайловларда номзод сифатида қатнашиш учун қўшинларни тарк эта олмаслиги ҳақида маълумот берилди.
Қарор эндиликда Кнессет (парламент) томонидан тасдиқланиши керак.
Исроил бош вазири Бенямин Нетаньяху таъкидлаганидек, февраль ойи охирида маҳаллий сайловлар ўтказилиши ушбу сайлов кампаниясида кўпроқ захирадаги зобитлар иштирок этишига имкон бериши керак.
"Биз одатда уруш пайтида сайловларни ўтказмаймиз, лекин бу сайловлар олдиндан белгилаб қўйилган эди. Улар аллақачон бир марта қолдирилди. Уларни узоқ вақтга қолдириш жуда қийин бўлса-да, иккита вариант бор: уларни январь ойининг охирида ёки февраль ойининг охирида ўтказиш. Менинг тавсиям аниқ: сайловни февраль ойининг охирида ўтказиш керак. Чунки ўша пайтда захирадаги зобитлар сайловда қатнашиш имконига эга бўлади. Бу асосий ва муҳим ҳуқуқдир", — деди ҳукумат раҳбари.
Изоҳ (0)