Сўнгги технология, илм-фан ва бизнесга оид янгиликларни ёритувчи The Verge нашрида янги Oppo Find N5 смартфонининг суратлари жойлаштирилди. Мазкур гаджет китоб кўринишида букланадиган дунёдаги энг ингичка смартфон бўлиб, ўзининг ултра юпқа дизайни ва илғор технологиялари билан ажралиб туради.
Oppo Find N5 нинг расмий тақдимоти жорий йил февраль ойининг охирида Хитойда бўлиб ўтиши кутилмоқда. Кейинчалик ушбу модел хорижий бозорларга, жумладан, АҚШга OnePlus Open 2 номи билан экспорт қилиниши режалаштирилган.
Букланган ҳолатда Find N5 бошқа шунга аналог қурилмалар ичида энг ингичкаси ҳисобланади, бироқ очилганда, қалинлиги бўйича Huawei Mate ХТ моделидан ортда. Oppo’нинг энг сўнгги модели бундай параметрга икки панелли механизм туфайли эриша олди. Улар смартфон йиғилганда янада ихчам бўлишига замин яратади.
Рекорд даражада ингичка бўлишига қарамай, Oppo Find N5 кўп шикастланишга бардошли ва бақувват қурилмадир. Унинг USB-C улагичи металл рамка ичига киритилган. Асосий камераси махсус периксоп линзасига эга бўлиб, у узоқ масофадан ҳам сифатли суратларни олиш имконини беради.
Қурилма Qualcomm Snapdragon 8 Elite чипи билан таъминлангани ҳисобига юқори унумдорлик ва энергия самарадорлигини таъминлайди. Шунингдек, Oppo Find N5 IPX6, IPX8 ва IPX9 каби юқори даражадаги сувга чидамлилик сертификатларига эга бўлиб, бу уни сув остида ҳам фойдаланиш имконини беради.
The Verge маълумотларига кўра, смартфон оқ ва қора рангда ишлаб чиқарилади. Унинг бинафша рангли версияси эса ҳозирча фақат Хитойда сотувга қўйилади.
Изоҳ (0)