Samsung компанияси катта экран ва кенг аккумулятор сиғимига эга Galaxy Jump2 смартфонини тақдим этди, деб хабар беради GizmoChina.
Samsung Galaxy Jump2 телефони томонлар нисбати 20:9 бўлган, Full HD+ сифат ҳамда 120 герцли тасвир янгиланиш частотасини қўллаб-қувватловчи 6,6 дюймли дисплей билан жиҳозланган. Экран Gorillа Glass 5 шишаси билан ҳимояланган. Олд қисмида 8 мегапикселли селфи камера учун қирқим мавжуд.
Қурилманинг орқа камераси ф/1.8 диафрагмага эга 50 мегапикселли асосий датчик, 5 мегапикселли ўта кенг бурчакли объектив ва бир жуфт 2 мегапикселли макро суратга олиш ҳамда чуқурликни ўлчаш датчиклари билан жиҳозланган. Смартфон Android 12 операцион тизими асосидаги One UI 4.1 да ишлайди.
336 долларга баҳоланаётган аппаратнинг узоқ муддат ишлашига 5000 мА/соатли аккумулятор хизмат қилади, у 25 ваттли тезкор қувватланиш функциясига эга. Шунингдек, смартфоннинг асосини 2,4 гигагерц такт частотали Exynos 1280 процессори ташкил этади.
Гаджет 6 гигабайт тезкор ва 128 гигабайт ички хотира ёрдамида ишлайди. Хавфсизлик қисмига ён томонидаги бармоқ изи сканери жавоб беради. Бошқа опциялари қаторидан иккита SIM-карта, 5G, Wi-Fi 802.11аs, Bluetooth 5.1, GPS, NFC чипи, USB-C порти ва 3,5 миллиметрли аудиоразъёмни қўллаб-қувватлашини келтириш мумкин.
Аввалроқ Xiaomi улкан аккумулятор сиғимига эга ҳамёнбоп Redmi 10 Power’ни тақдим этгани, Vivo компанияси ичидан метеорит бўлаги ўрин олган X Note Aerospace номли махсус смартфонини сотувга чиқаргани тўғрисида хабар берилганди.
Изоҳ (0)