Apple компаниясининг топ-менежерларидан бири iPhone 10 йил ичида iPod каби ўз аҳамиятини йўқотиши мумкинлигини айтди. Бунга сунъий интеллект сабаб бўлиши башорат қилинмоқда.
The Verge нашрининг ёзишича, бу қизиқарли фикрларни Apple’нинг интернет хизматлари бўйича вице-президенти Эдди Кю АҚШда ўтаётган суд эшитувлари чоғида айтиб ўтди. АҚШ ҳукумати Google’нинг Apple’га йиллик 20 миллиард доллар тўлов эвазига iPhone’даги асосий қидирув тизими бўлиб қолаётган битимни тергов қилмоқда. Бу борада фикр билдирар экан, Apple вакили янги технологиялар анъанавий гаджетлар ва қидирув тизимларидан воз кечилишига олиб келиши мумкинлигини таъкидлади.
“Биз нефть компанияси эмасмиз, тиш пастаси ҳам ишлаб чиқармаймиз — булар абадий мавжуд бўладиган нарсалар. Гарчи бу ғалати эшитилса-да, эҳтимол, сизга 10 йилдан сўнг iPhone керак бўлмай қолади”, деди Кю.
Унинг фикрича, сунъий интеллект iPhoneъни Apple тарихида бир вақтлар энг катта даромад келтирган гаджет — iPod каби йўқолиб кетиши мумкин:
“Биз iPod’ни ўзимиз iPhone ёрдамида йўқ қилган эдик”, дея эсга олди у.
Бугунги кунда iPhone Apple’нинг асосий даромад манбаи бўлиб қолмоқда ва ҳозирча компания унга тенг муқобил топа олмаган. Электромобиль бозорига чиқишга уриниш лойиҳаси ёпилиш билан якунланди, биринчи VR-гарнитураси эса жуда кам сотилмоқда. Айни пайтда Apple робототехника устида ишламоқда ва кейинчалик iPhone ўрнини босиши мумкин бўлган ақлли кўзойнаклар ишлаб чиқиш устида ишламоқда.
Айрим компаниялар аллақачон сунъий интеллектли гаджетлар ёрдамида смартфонларни алмаштиришга уриниб кўрди, лекин бу ҳозирча муваффақиятли кечмади. Масалан, Humane AI Pin номли ақлли пейжер атиги бир йил “яшади” ва бутунлай ёпилди, Rabbit R1 фойдаланувчиларининг 95 фоизи эса қурилмадан фойдаланишни тўхтатди.
Изоҳ (0)