Компания барча одамларга тенг рақамли имкониятларни тақдим этиш ниятида.
Дунёдаги энг юқори технологик корпорациялардан бири ўзининг илмий-техник салоҳиятидан фойдаланган ҳолда, глобал ижтимоий муаммоларни ҳал қилишда фаол иштирок этишга интилмоқда.
Бунга мисоллардан бири сифатида, Huawei техникаси қандай қилиб, атроф-муҳитни қутқариш учун курашда ёрдам бераётгани ҳақида Huawei компанияси бошқаруви раиси ўринбосари Кен Ху сўзлаб берди. Бу ерда гап Rainforest Connection нотижорат ташкилоти ҳақида кетаётган бўлиб, унинг раҳбари Тофер Уайт тропик ўрмонни сақлаб қолиш учун эски Huawei смартфонларидан фойдаланиш усулини ўйлаб топди.
Ғоянинг ўзи жуда оддий – смартфонлар кичик қуёш батареяларига уланади, кейин эса дарахтларнинг юқори қисмига баланд қилиб ўрнатилади ва уларнинг ёрдамида Rainforest Connection мутахассислари сунъий интеллектга асосланган булути иловалар орқали ўрмондаги товушларни реал вақт тартибида кузатишлари мумкин бўлади. Агар тўсатдан улар моторли арраларнинг товушини ёки браконьерлик билан боғлиқ ҳаракатга хос товушларни эшитиб қолишса, бу ҳақда дарҳол ҳуқуқни муҳофаза қилиш органларига хабар беришлари мумкин бўлади.
Кен Хунинг сўзларига кўра, Уайтнинг муаммони ҳал қилишдаги бундай ёндашуви Huawei компаниясида катта таассурот қолдирди, чунки бу ерда аниқ мақсад кўриниб турибди ва унга эришиш учун замонавий технологиялардан фойдаланилмоқда.
Худди шу каби, Huawei ҳозирги замоннинг энг муҳим муаммоларидан бирини ҳал қилишга, яъни турли мамлакатлар ва минтақалардаги одамлар ўртасидаги рақамли тафовутни камайтиришга интилмоқда. Хусусан, Huawei фаолияти туфайли дунё аҳолисининг учдан бир қисмидан кўпроғи, шунингдек нафақат йирик шаҳарларда, балки илгари рақамли хизматлардан фойдаланиш имконига эга бўлмаган дунёнинг энг чекка ҳудудларида яшовчилар ҳам рақамли хизматларга уланиш имкониятига эга бўлдилар.
Бунинг учун компания муҳандислари анъанавий ускуналарни ҳам қайта қуриб чиқишди. Хусусан, таянч станциялар ҳажми рюкзак ҳажмига қадар кичрайтирилди, бунинг ёрдамида эса, оптик толали кабел ўтказиш мумкин бўлмаган жойларда алоқани йўлга қўйиш имкониятига эришилди.
Бироқ, Кен Хунинг фикрига кўра, фақатгина фойдаланиш имкониятига, яъни компьютерлардан, смартфонлардан ва интернет тармоғидан фойдаланиш имкониятига бор эътиборни қаратиш барча муаммоларни ҳал қила олмайди, бунда технологиялар яратадиган қийматга ҳам алоҳида эътибор қаратиш лозим. Шунинг учун, Huawei компанияси тармоққа уланиш ва фойдаланиш имкониятидан ташқари, одамлар учун ҳақиқий қиймат яратишга қодир технологияларни кенг ёйишга ҳам эътибор қаратишга қарор қилди.
Болалар кўз касалликларига қарши кураш
Болалар офталмологи Виктория Пуэё билан ҳамкорлик олиб бориш орқали Huawei болаларда учрайдиган кўз касалликларига ташхис қўйишни соддалаштириш учун ўзининг технологик имкониятларидан фойдаланмоқда. DIVE-Medical стартапи билан биргаликда Huawei муҳандислари TrackAI деб номланган иловани ишлаб чиқдилар, унинг ёрдамида ҳатто тиббий маълумотга эга бўлмаган ҳолда ҳам одамлар болаларнинг қайси бирида кўриш қобилияти билан боғлиқ муаммонинг ривожланиш хавфи борлигини ўз вақтида аниқлашлари мумкин.
Жаҳон соғлиқни сақлаш ташкилотининг маълумотларига кўра, дунёда кўриш қобилиятида муаммоси бор болалар сони 19 миллионни ташкил этади. Уларнинг кўпчилигида касаллик туфайли кўриш қобилиятини бутунлай йўқотиш хавфи бор.
Кўп ҳолларда касалликларни ўз вақтида аниқлаш билан даволаш мумкин бўлса ҳам, одатда болалар шифокорларнинг саволларига тўлақонли жавоб бера олмаслигини ҳисобга олиб, тўғри ташхис қўйиш жуда қийин бўлади. Шунинг учун, Huawei компанияси бундай касалликларга ташхис қўйиш жараёнини максимал даражада соддалаштиришга интилмоқда.
Шундай қилиб, TrackAI иловаси Huawei смартфонларидаги сунъий интеллект чиплар асосида ишлайди ва болаларнинг кўзлари ҳаракатланаётган нарсаларга қандай таъсирланаётганини кузатади. Ушбу маълумотлардан фойдаланиб, ҳатто олти ойлик болаларда ҳам кўриш қобилиятини бузилиши бўйича ташхис қўйиш мумкин бўлади. Шу билан бирга, қурилманинг ўзи портатив, яъни бир жойдан бошқасига кўчиришга қулай, шунингдек барча маълумотлар билан смартфонда ишланади, унинг нархи бошқа турдаги қимматбаҳо тиббий жиҳозларнинг нархидан анча паст.
Рақамли кўникмалар даражасини ошириш
Яна бир муҳим муаммо – бу одамларда рақамли кўникмаларнинг етишмаслиги бўлиб, бу муаммо ҳатто саноати ривожланган мамлакатларда ҳам учрайди. Европа комиссияси томонидан ўтказилган сўров натижаларига кўра, Европа Иттифоқи мамлакатлари фуқароларининг 43 фоизи ҳатто асосий рақамли вазифаларни, масалан, Интернетда керакли маълумотларни топиш каби ишларни ҳам бажара олмайдилар. Бу борада, Европа Комиссияси ушбу муаммони махсус дастурларни жорий қилиш орқали ҳал қилмоқда ва Huawei ушбу тажрибани бошқа ҳудудларга ҳам ёйишга интилмоқда.
Хусусан, Huawei компанияси Кенияда Бельгиянинг Close the Gap нотижорат ташкилоти, UNESCO ва Safaricom билан ҳамкорлик қилмоқда ва бу ҳамкорлик асосида улар 40 футли пўлат контейнерларни кўчма компьютер синфларига – Digitrucks’га айлантирмоқдалар.
Digitrucks стандарт равишда столлар, рақамли гаджетлар билан жиҳозланади ва Интернет тармоғига симсиз кенг тармоқли уланади. Ушбу кўчма компьютер синфларининг электр энергияси манбаи сифатида қуёш панелларидан фойдаланилади, бу эса ҳатто энг чекка қишлоқларда ҳам рақамли билимларни ўрганиш имконини беради. Huawei 2020 йилда биргина Кениянинг ўзида камида 6000 нафар ёш талабани ва 1000 нафар ўқитувчини ўқитишни режалаштирмоқа.
Рақамли дунёни янада инклюзивлаштириш
Huawei компаниясининг яна бир ташаббуси TECH4ALL деб номланган дастур бўлди. Ушбу дастур доирасида компания рақамли тафовутни камайтириш, турли жамоалар учун янги дастурий иловаларни ишлаб чиқиш ва рақамли технологиялар билан ишлаш кўникмаларини тарқатиш учун кўплаб ташкилотлар билан ҳамкорлик қилади.
Лойиҳанинг асосий мақсади – ҳар қандай одамга рақамли технологиялардан фойдаланиш имкониятини тақдим этиш, ушбу технологияларни ҳар бир уйда ва ҳар бир ташкилотда жорий этиш, шу тариқа битта тармоққа уланган «ақлли» қурилмалар дунёсини яратишдир. Умумий ҳисобда, Huawei ушбу ташаббусни олиб бориши натижасида, кейинги беш йил ичида яна камида 500 миллион кишига рақамли технологиялардан фойдаланиш имкониятига эга бўлиши учун ёрдам беришни режалаштирмоқда.
Улар нафақат тармоққа улана олишлари, балки сунъий интеллект, булутли омбор ва ақлли қурилмалар каби технологияларнинг имкониятларидан ҳам фойдаланишлари мумкин бўлади.
«TECH4ALL янада кўпроқ одамлар, уй хўжаликлари ва ташкилотлар учун ажойиб рақамли дунёга эшик очиб беришга интилмоқда. Биз аҳолининг ижтимоий заиф гуруҳларини ҳимоя қилишни ва оддий одамларни кенг имкониятли одамларга айлантиришни хоҳлаймиз. Технологиянинг ўзига хос аҳамияти ҳам шундадир», – деб таъкидлади, Кен Ху.
Шу билан бир қаторда, Huawei фикрига кўра, гарчи у жуда катта компания бўлса-да, бу мақсадларга эришиш учун биргина компаниянинг ҳаракати камлик қилади, бунинг учун барча манфаатдор томонлар ўзаро биргаликда ҳаракат қилишлари зарур. «Биз фақатгина биринчи кичик қадамни қўйдик ва барча одамлар ва ташкилотларни бизнинг ташаббусимизни қўллаб-қувватлашга чорлаймиз», – деб таъкидлади Huawei бошқаруви раиси ўринбосари.
Изоҳ (0)