Huawei nova Y70 Plus: катта экранга эга юқори автономли «махлуқ» тақдим этилди

Huawei компанияси улкан аккумулятор сиғимига эга янги смартфонини тақдим этди, деб хабар беради GSMArena.

Янги қурилма пикселлари нисбати 1600х720 га тенг 6,75 дюймли LCD-дисплей билан жиҳозланган бўлиб, олд тарафидаги томчисимон қирқимга f/2.0 дифрагмали селфи камера жойлаштирилган (8 мегапикселл).

Гаджетнинг яна бир ўзига хослиги — сиғими 6000 мА/соатни ташкил этувчи кенг сиғимли аккумуляторга эгалигида. Ишлаб чиқарувчининг маълум қилишича, смартфон бир марта қувватланиш орқали уч кунгача ишлай олади. Шунингдек, қурилма тезкор қувватланиш функциясига ҳам эга, бироқ у чекланган — 22,5 ватт.

Смартфоннинг орқа қисмида асосий датчиги 48 мегапикселга тенг учталик камера ўрин олган. Унинг ёнида 120 бурчак остида тасвирга олиш имкониятга эга 5 мегапикселли ва чуқурликни ўлчовчи 2 мегапикселли датчик жойлашган.

Huawei’нинг янги смартфони 1 май санасидан сотувга чиқади. 4/128 гигабайтли версияси нархи 365 долларни ташкил этади.

Аввалроқ Россиянинг Caviar бренди Huawei P50 Pro смартфонини «Алёнка» шоколадига айлантирилгани тўғрисида хабар берилганди.