Apple компанияси Samsung’ни ортда қолдириб, iPhone смартфонларининг рекорд ҳажмдаги савдолари фонида дунёдаги энг етакчи брендга айланди. Компания ўтган йилнинг сўнгги чорагида Huawei позицияси жиддий кучсизлангани сабаб катта «сакрашни» амалга оширди, деб хабар беради IXBT.
Counterpoint Research маълумотларига кўра, ўтган чоракда iPhone смартфонларини етказиб бериш 22 фоизга ортган. Бу каби ўсиш бешинчи авлод алоқа тармоғини қўллаб-қувватлайдиган iPhone 12 линейкасининг тақдим этилгани билан изоҳланмоқда. Шунингдек, олдинги моделлар савдоси ҳам камаймаган, нархлар пасайтирилган бўлса-да, талаб барқарор.
Компания 90 миллион дона смартфон сотиб, бозорнинг 23 фоиздан ортиғини эгаллаган. Таҳлилчиларнинг таъкидлашича, Apple Хитойдаги премиум смартфонлар бозорида ўз ўрнини кучайтириб олган. Apple бош директори Тим Кукнинг сўзларига кўра, Хитойда энг кўп сотиладиган премиум смартфонларнинг учтадан иккитаси Apple томонидан ишлаб чиқарилган.
Чорак якунлари бўйича иккинчи ўрин Samsung’га насиб кетди — бозорнинг 19 фоизи. Учинчи ўринни Xiaomi эгаллаган бўлса, унинг ортидан Oppo ва Vivo жойлашган. Huawei эса 6-поғонага тушиб кетган.
Ўтган йилги натижалар кўриб чиқиладиган бўлса, олдинги учта чоракда Samsung етакчилик қилган, Apple — иккинчи ўрин.
Эслатиб ўтамиз, 2020 йилнинг декабрида Gartner таҳлилий компанияси жаҳон бозоридаги смартфонлар савдоси бўйича учинчи чорак ҳисоботларини эълон қилганди. Унга кўра, Xiaomi биринчи бор Apple’ни ортда қолдирганди.
Изоҳ (0)