Смартфонлар ҳаётимизга шу қадар чуқур кириб келганки, кўплаб одамларда гаджетларга нисбатан қарамлик шаклланган.
Американинг Metaphone стартапи ушбу муаммони ечиш учун ноодатий таклиф берди: бу 6,35 мм қалинликдаги мустаҳкам, шаффоф акрилдан ясалган смартфон нусхаси бўлиб, қўлга олинганда ҳақиқий телефонга ўхшаб кетади, аммо ҳеч қандай техник функция бажармайди.
Metaphone’нинг бу ноодатий “гаджети” ташқи кўринишидан шишани эслатади, у синмайдиган акрил материалидан тайёрланиб, ҳажми iPhone 15 моделига мослаб ишланган.
Қўлда ушлаганда ёки чўнтакда олиб юрганда у ҳақиқий смартфонни эслатади, шунинг учун фойдаланувчида севимли гаджети ёнидагидек таассурот пайдо бўлади ҳамда хавотир ҳисси камаяди.
Пластинка орқали кўринмас лентани варақлаётган видео TikTok’да машҳур бўлиб, 50 миллиондан ортиқ марта кўрилди.
Ғоя америкалик Эрик Антоновга тегишли. Унинг стартапи Индиэгого краудфандинг платформасида 500 доллар ўрнига 1 100 доллар тўплади.
Metaphoneънинг шаффоф пластинкалари Индиэгого орқали сотувга қўйилган, бироқ ҳозирча барча нусхалар сотиб бўлинган. Шаффоф “гаджет” нархи ҳозирда 20 доллар пушти версияси эса 25 доллар туради. Дастлабки ишлаб чиқариш ишлари 2025 йил июнь ойига режалаштирилган.
Ушбу ихтирони харид қилган фойдаланувчилар айтишича, ижтимоий тармоқларга кўп чалғийдиганлар учун бундай пластинка кўпроқ китоб ўқишга ва фикрларни жамланишга ёрдам бермоқда.
Изоҳ (0)