АҚШ президенти Дональд Трамп маъмурияти 15 май куни ҳукумат грантларидан маҳрум бўлган “Америка овози” радиостанциясининг 600 га яқин ходимини ишдан бўшатди. Бу ҳақда New York Times газетаси хабар бермоқда.
“Трамп маъмурияти пайшанба куни радиостанциянинг 600 га яқин ходимини ишдан бўшатди. Ишдан бўшатиш шартнома асосида ишлайдиган ходимларга, асосан журналистларга, шунингдек, баъзи маъмурий ходимларга таъсир қилди. Бу ходимларнинг учдан бир қисмидан кўпроғини ташкил этади”, дейилади нашр хабарида.
“Америка овози” директори Майкл Абрамовис ходимларга йўллаган электрон хатида ишдан бўшатишларни “тушунарсиз” деб атаган.
Таъкидланишича, ишдан бўшатилган журналистларнинг бир қисми июнь ойи охиригача АҚШни тарк этиши керак, чунки уларнинг иммиграцион мақоми янгиликлар ташкилотидаги иши билан боғлиқ эди.
АҚШ Глобал медиа агентлиги (USAGM) катта маслаҳатчиси Кери Лейкнинг сўзларига кўра, оммавий ахборот воситалари ходимлари АҚШ президенти маъмуриятининг қонуний ваколатларига ва режалаштирилган “федерал бюрократияни қисқартириш”га мувофиқ ишдан бўшатилган.
Апрель ойи охирида АҚШ федерал судьяси Ройс Ламберт ҳукуматга “Америка овози” радиостанциясини ўз ичига олган АҚШ Глобал медиа агентлиги (USAGM) фаолиятини қайта тиклаш, шунингдек, агентликнинг барча ходимларини қайта ишга олиш мажбуриятини юклади. Қарор “Америка овози”нинг бир қатор ходимлари томонидан USAGM’ни тарқатиб юбориш тўғрисидаги қарор юзасидан берилган даъво аризасини кўриб чиқиш жараёнида қабул қилинди.
Дональд Трамп президентлигининг бошида бюрократияга қарши кураш доирасида бир нечта идораларнинг функциялари ва ишини максимал даражада қисқартириш тўғрисидаги фармонни имзолади. Улар орасида “Озод Европа/Озодлик радиоси” ва “Америка овози”ни назорат қилувчи АҚШ ҳукуматининг Глобал медиа агентлиги (USAGM) ҳам бор эди.
Трампнинг қарорига кўра, баъзи давлат ташкилотлари ўз функциялари ва ходимларининг фаолиятини АҚШ қонунчилигида кўзда тутилган минимал даражагача қисқартириши керак эди.
Изоҳ (0)