Франциялик такси ҳайдовчилари мамлакат бўйлаб бир қатор шаҳарларда тиббий ташишлар учун янги тарифларни жорий этиш режаларига қарши норозилик билдириб, йўлларда ҳаракатланишни қийинлаштирди. Бу ҳақда France Bleu радиостанцияси хабар берди.
“Бугун душанба куни эрталабдан бутун мамлакат бўйлаб кўплаб “шиллиққурт операциялари” (йўлда атайлаб секин ҳаракатланиш) ўтказилмоқда. Такси ҳайдовчилари тиббий ташишларнинг янги қоидаларига норозилик билдириш мақсадида иш ташлаяпти ва намойишлар уюштирмоқда”, дея хабар қилди радио.
Париж шаҳрида юзлаб таксилар А6, А13 автомагистраллари ва РН 12 миллий йўлида транспорт ҳаракатини атайлаб секинлаштирган.
Маълум қилинишича, шаҳар чеккасидан келган такси ҳайдовчилари кортежлари Париждаги Транспорт вазирлигига йўл олган.
Шунингдек, такси ҳайдовчилари Тур шаҳридаги тиббиёт муассасалари олдида ҳам норозилик намойишлари ўтказмоқда. Нант шаҳрига минтақадан 200 дан ортиқ такси ҳайдовчиси йиғилиб, ташқи ҳалқа йўлида ҳаракатни тўхтатиб қўйган. Транспорт ҳаракатидаги қийинчиликлар Страсбургда ҳам кузатилмоқда, жанубий Марсель ва Тулон шаҳарларидаги норозилик намойишлари туфайли йўлларда ҳаракатланиш жуда қийинлашган.
Шунингдек, Тулуза, Гренобл, Авинон, Перпинян, По, Кан ва Дижон шаҳарларида ҳам юзлаб такси ҳайдовчилари иштирокидаги шунга ўхшаш норозилик намойишлари ўтказилмоқда.
Париждаги норозилик намойишлари пайтида талабалар акцияси иштирокчилари АҚШ байроғини йиртиб, АҚШ президенти Дональд Трамп ва унинг тариф сиёсатига қарши шиорлар айтишди.
Изоҳ (0)