AQSH hukumati Amerka pasportini olish uchun kurashayotgan muhojirlar haqida shou suratga olish g‘oyasini ilgari surmoqda. Bu haqda Daily Mail xabar bermoqda.
Ma’lum qilinishicha, AQSH ichki xavfsizlik vaziri Kristi Noem fuqarolikka nomzodlar “tezlashtirilgan AQSH fuqaroligini olish imtiyozi uchun” bir-biri bilan bellashadigan ko‘rsatuv g‘oyasini ma’qullagan va shou loyihasini ishlab chiqishda ishtirok etgan.
Bundan tashqari, Noem AQSH Fuqarolik va immigratsiya xizmati amaldorlariga televizion tanlovda ovozlarni hisoblashni taklif qilgan.
G‘oya muallifi ilgari bir nechta teleko‘rsatuvlar ustida ishlagan prodyuser va ssenariy muallifi, kanadalik Rob Uorsoff hisoblanadi.
“Men hech qanday siyosiy mafkuraga bog‘liq emasman. Sobiq muhojir sifatida men shunchaki immigratsiya jarayonini ulug‘laydigan, amerikalik bo‘lish nimani anglatishini ko‘rsatadigan va amerikalik bo‘lishni eng ko‘p istaydigan odamlar nigohi orqali umummilliy suhbat olib boradigan shou yaratishga harakat qilyapman”, dedi u loyiha tavsifida.
Uorsoffning rejalariga ko‘ra, “Amerikalik” shousida ishtirokchilar poyezdda mamlakat bo‘ylab sayohat qilishadi va har bir mintaqada sinovdan o‘tishadi. Viskonsinda yog‘och g‘o‘lalarini dumalatish, San-Fransisko konida oltin qazib olish yoki NASA markazida raketa uchirish kabi mintaqaviy “madaniy” musobaqalarda qatnashadilar.
Loyiha g‘olibi Vashingtondagi Kapitoliy zinapoyalarida to‘g‘ridan-to‘g‘ri efirda qasamyod qiladi.
G‘olib AQSH fuqarosi bo‘lish imkoniyatiga ega bo‘ladi va “amerikacha saxiylik bilan” million aviamil yoki umrbod benzin zaxirasigacha bo‘lgan sovrinlarni qo‘lga kiritadi. Boshqa ishtirokchilar ham fuqarolikni soddalashtirilgan tartibda olish uchun dastlabki tekshiruvdan o‘tishadi.
Ta`kidlanishicha, vazirlikdagi ayrim xodimlar muhojirlarning og‘ir ahvoli shou elementiga aylanib borayotganidan xavotirda ekanligini bildirishgan.
Idora bir necha haftadan beri striming hamkorini qidirmoqda, variantlar orasida Netflix platformasi ham bor. Avvalgi shunga o‘xshash urinishlar muvaffaqiyatsizlikka uchragan bo‘lsa-da, loyiha jamoasi muvaffaqiyatga umid qilmoqda.
Izoh (0)