Америка Дерматология академияси олимлари юрак касалликлари ҳақида аввалдан дарак берувчи учта ноодатий белгилар ҳақида маълумот берди.
BristolLive нашрига кўра, бутун дунёда юрак-қон томир касалликлари бевақт ўлимнинг асосий сабабларидан бири бўлиб қолмоқда. Бундай касалликлар ҳар йили 18 миллиондан ортиқ одамнинг ҳаётига зомин бўлади. Юрак-қон томир касалликлари орасида инсульт, ишемик касаллик ва юрак етишмовчилиги кабилар тобора ёшроқ инсонларда ҳам учрамоқда.
Муаммо шундаки, кўпчилик организмидаги муҳим аломатларга эътибор бермайди ёки жуда кеч англаб етади. Юрак касалликлари фақат кўкрак оғриғи ёки нафас қисилиши билан кечмайди. Баъзан бу белгилар кутилмаган жойларда, жумладан, оёқ панжаларида ҳам пайдо бўлиши мумкин.
Бармоқлардаги қаттиқ тугунлар
Оёқ бармоқларида учрайдиган бундай касаллик Ослер тугунлари деб аталади. Улар қўлларда ҳам учраши мумкин.
“Бу тугунлар бир неча соатдан бир неча кунгача сақланиши мумкин. Улар ўз-ўзидан йўқолади, аммо беморга инфекцияга қарши даволаниш зарур бўлади, чунки бу ҳолат бактериялар сабабли юзага келади, антибиотиклар кўпинча фойда беради. Баъзида операция ҳам талаб этилади”, дейди олимлар.
Ослер тугунлари юрак ички қаватининг яллиғланиши — инфекцион эндокардит билан боғлиқ муҳим клиник белгилардан биридир.
Оёқларнинг шишиши
Америка Дерматология академиясига кўра, бу юракнинг нотўғри ишлаётганидан далолат бўлиши мумкин. Юрак касалликлари сабабли юзага келган шиш оёқ панжаларида, тўпиқларда ва оёқларнинг бошқа қисмларида кузатилади.
Кўкарган бармоқлар
Бу қон томирларининг яхши айланмаётганидан дарак бериши мумкин, аммо одам шунчаки совуқ қотганида ҳам бармоқлар кўкаргандек бўлиши мумкин ва бу одатий ҳол.
“Агар тана терисининг бирор қисми илиқ бўлган ҳолатда ҳам бармоқлар кўк (ёки бинафша) рангга кирса, бу қон таркибида кислород етарли эмаслигини билдиради”, дейилади академия хулосасида.
Бу ҳолат охир-оқибат тери остидаги тўқималарнинг нобуд бўлишига олиб келади. Тиббиётда бу ҳолат “сианоз” деб аталади.
Изоҳ (0)