Walt Disney компанияси Яқин Шарқда илк бор Disneyland қурилишини расман тасдиқлади. Янги кўнгилочар парк Бирлашган Араб Амирликларининг Абу Даби шаҳрида, Яс оролида жойлашади.
Лойиҳанинг ҳамкори сифатида маҳаллий “Мирал” компанияси иштирок этади. Бу компания аввал ҳам Абу Дабида бир нечта йирик туристик лойиҳаларни амалга оширган.
Расмий баёнотга кўра, бу лойиҳа Диснейънинг минтақадаги энг муҳим тематик курорти бўлиб, у Disney, Pixar, Marvel ва Lucasfilm каби машҳур брендлар асосидаги ноёб зоналарни ўз ичига олади. Паркнинг умумий майдони 100 гектардан ошади. У ерда меҳмонхоналар, дўконлар ҳамда ресторанлар бўлади. Лойиҳанинг концепцияси минтақа маданиятига мос тарзда ишлаб чиқилади.
Архитектура ва тематик режалаштириш ишлари тахминан икки йил давом этади. Ундан кейин қурилиш ишлари яна 6 йил давом этиши кутилмоқда. Шу боис, паркнинг очилиши 2032 йилдан олдинроқ бўлмайди. Ҳозирча очилиш санаси ва лойиҳа қиймати аниқ кўрсатилмаган, бироқ бу миллиардлаб доллар миқдоридаги инвестицияларни ўз ичига олиши айтилмоқда.
Дунё тарихидаги биринчи Disneyland 1955 йил 17 июлда АҚШнинг Калифорния штатидаги Анаҳайм шаҳрида очилган. У Walt Disney’нинг бевосита раҳбарлигида яратилган бўлиб, кейинги лойиҳаларга асос бўлган. Бугунги кунда дунё бўйлаб олтита йирик Дисней курорти мавжуд.
Абу Дабидаги бу янги парк еттинчи Disneyland бўлади ва Дисней брендининг янги минтақалардаги иштирокини кенгайтириш йўлида муҳим қадам ҳисобланади.
Изоҳ (0)