Эрон олий раҳбарининг катта маслаҳатчиси Али Акбар Велаяти АҚШ қўллови билан Жанубий Кавказда барпо этилиши режалаштирилган транспорт йўлагини ҳар қандай ҳолатда, ҳатто Россия ёрдамисиз ҳам тўсиб қўйишини билдирди. Бу ҳақда Tasnim ва Iran International хабар берди.
Али Акбар Велаяти назарда тутган транспорт йўлаги Зангазур коридори бўлиб, у Арманистон орқали ўтади ва Озарбайжонни мамлакатдан узилиб қолган Нахчивон Мухтор Республикаси билан қуруқлик орқали боғлайди. Арманистон бош вазири Никол Пашинян ҳамда Озарбайжон президенти Илҳом Алиев бунга Вашингтонда имзолаган тинчлик битими доирасида келишди.
Келишувга кўра, музокараларга воситачилик қилган Вашингтон Зангазур йўлагини ривожлантириш бўйича эксклюзив ҳуқуқ олади. АҚШ компанияси мазкур йўлакни 99 йил назоратга қилади.
Эроннинг кескин реакцияси
Велаяти мазкур лойиҳа “минтақа хавфсизлигига таҳдид солишини ва геосиёсий харитани ўзгартириши”ни таъкидлади.
“Жаноб Трамп Кавказни 99 йилга ижарага олинадиган кўчмас мулк деб ўйлайди. Бу йўлак Трамп ёлланма аскарлари учун кириш эшиги бўлмайди, уларнинг қабристонига айланади”, деди у.
Унинг сўзларига кўра, Эрон Зангазур йўлагига доимо қарши бўлган, чунки у “Арманистон ҳудудий яхлитлигини бузиб, мамлакатни парчалаши” мумкин. Велаяти Туркия ва Озарбайжон ушбу режани илгари сурганида, Эрон шимоли-ғарбий чегарасида бир неча бор ҳарбий машғулотлар ўтказганини эслатди.
“Россия билан ёки Россиясиз, Жанубий Кавказ хавфсизлигини ҳимоя қилиш учун ҳаракат қиламиз”, деди Эрон олий раҳбарининг маслаҳатчиси.
Велаяти Зангазур йўлагини “оддий савдо йўли эмас, сиёсий фитна” деб атади ва НАТО бу билан Эрон ҳамда Россия ўртасига “илон каби жойлашиб олишга ҳаракат қилаётгани”ни таъкидлади.
Изоҳ (0)