Узоқ кутилган “Оппоғой” ремейки 21 март куни бўлиб ўтган премерадан сўнг танқидчилар томонидан мақталган бўлса-да, томошабинларнинг эътирофига сазовор бўлмади. Машҳур IMDb рейтинг платформасида унинг рейтинги 10 баллдан атиги 1,6 баллни ташкил этмоқда (хабар ёзилган вақтда 188 минг нафар овоз йиғилган).

Бу IMDb тарихидаги энг паст натижалардан бири ҳисобланади, гарчи фильм ҳозирча расмий анти-рейтинг лойиҳалар рўйхатига киритилмаган. Шунга қарамай, агар жорий баҳолар инобатга олинса, “Оппоғой” энг ёмон фильмлар орасида 8-ўринни эгаллаши мумкин.
Кўпгина фойдаланувчилар фильмга атиги битта юлдуз қўйган, ва аксинча, 4,7 минг томошабин “Оппоғой”ни юқори баҳолаб, 10 баллга баҳолаган.
Шунингдек, янги “Оппоғой” Disney фильмлари рейтингида ҳам рекорд даражадаги паст кўрсаткични қайд этди — илгари студияга тегишли ҳеч қайси ремейк бундай паст баҳо олмаган. Эслатиб ўтамиз, эртак фильмнинг бюджети 250 миллион доллар деб баҳоланмоқда.
Сюжет ҳақида

Фильм классик “Оппоғой ва етти гном” эртагидан илҳомланган бўлса-да, баъзи асосий элементлар ўзгартирилган. Оппоғой қаҳрамони аввалгидек бечора малика эмас, балки мустақил ва жасур қаҳрамон сифатида тасвирланган. У ўз тақдирини ўзи белгилашга ҳаракат қилади.
Етти гном ўрнига фильмда бошқа турдаги персонажлар акс этган. Бу ўзгариш фильм эълон қилингандан бери энг кўп танқид қилинган жиҳатлардан бири бўлди. Ёвуз қиролича эса аввалгидек гўзалликка ташна ва Оппоғойни йўқ қилишга ҳаракат қилади. Бироқ бу версияда унинг мотивлари янада кенгроқ ёритилган.
Фильм феминистик ва замонавий ғояларни илгари суришга уринган бўлса-да, томошабинларнинг аксарияти бу ўзгаришларни илиқ кутиб олмади. Кўпчилик анъанавий эртакнинг ўзгариб кетганидан норози бўлиб, ремейкни кескин танқид қилмоқда.
Изоҳ (0)