Ўзбекистонда 2025 йил 1 ноябрдан малакасини ошириш ва касбга қайта тайёрланиш истагидаги шахсларга қўшимча таълим олиш учун “касб ваучери” бериш тартиби жорий этилади.
“Меҳнат муносабатлари ва касбга тайёрлаш тизимини такомиллаштириш ҳамда иш берувчиларни рағбатлантиришга оид қўшимча чора-тадбирлар тўғрисида”ги президент фармонида белгиланишича, “касб ваучери” ссуда сифатида берилади.
Шахс ўқишни тугатиб сертификат олгач, ишга жойлашганидан сўнг ссудани 2 йил давомида Бандликка кўмаклашиш давлат жамғармасига қайтаради.
Қуйидаги шахсларга касб-ҳунар курсларида таълим олиш даврида жамғарма ҳисобидан меҳнатга ҳақ тўлаш энг кам миқдорининг 1 баравари миқдорида стипендия тўланади:
- ногиронлиги бўлган шахсларга;
- 3 ойдан ортиқ давом этадиган курсларда таълим олаётган Камбағал оилалар реестридаги оилалар аъзоларига;
- доимий яшаш жойидан бошқа ҳудудга қатнаб таълим олаётган шахсларга.
Бунда ишсизлик нафақаси тўланиши даврида ўқувчиларга стипендия тайинланмайди.
Камбағалликни қисқартириш ва бандлик вазирлиги икки ой муддатда ҳар бир ҳудуднинг ихтисослашуви ва имкониятларидан келиб чиқиб, камида биттадан касбий кўникмалар марказини муайян касбни ўргатишга ихтисослаштириш бўйича чора-тадбирлар дастурини аниқ муддатлар ва амалга ошириш механизмларини назарда тутган ҳолда тасдиқлаши белгиланди.
Бунда ихтисослашган касб кўникмалари марказлари тадбиркорлик субъектлари билан ҳамкорликда ва йирик иш берувчиларни кадрларни тайёрлаш жараёнига жалб қилган ҳолда ташкил этилади. Марказларда мутахассислар чуқурлаштирилган ҳолда тайёрланади, маҳорат дарслари ўтказилади, касблар бўйича малака оширилади.
Ушбу марказларни ташкил этиш ва молиялаштириш хусусий сектор, жамғарма, халқаро ташкилотларнинг грант ва қарз маблағлари ҳамда қонунчилик билан тақиқланмаган бошқа мабалар ҳисобидан амалга оширилади.
Президентнинг ушбу фармони билан 2025 йил 1 сентябрдан Ўзбекистонда корхоналар ўзида мавжуд вакансиялар ҳақида бандлик органларига маълумот бериш мажбуриятидан озод этилади. Шу билан бирга, иш берувчилардан бандлик органлари йўлланмаси асосида юборилган номзодларни ишга қабул қилмаганлик учун сабаб келтириш талаби бекор қилинади. Бу ҳолатда иш берувчи маъмурий жавобгарликка тортилишига чек қўйилади.
Изоҳ (0)