Time журналининг сентябрь сони тўлиғича замонавий қаҳрамонлар — нашрнинг талқинича «дунёни ўзгартирувчи аёллар»га бағишланган. Журнал сони 12 та муқова билан чиқди, улардан бирида 25 ёшли актриса ва қўшиқчи Селена Гомес, бошқаларида Ҳиллари Клинтон, Опра Уинфри ва океанограф Сильвия Эрл бор эди. Шу ойнинг ўзида Селена Гомес яна бир муқова — Business of Fashion’нинг поп маданият ёш қаҳрамонларига бағишланган юбилей сонида пайдо бўлди. Meduza қандай қилиб Селена Гомес ёш авлод юзи ва сайёранинг асосий ёш поп юлдузига айланганлиги ҳақида ҳикоя қилади.
«Селена Гомес дунёни ўзгартиряпти? Мен нимадандир бехабар қолдимми?», «Дунёни селфи ёрдамида ўзгартиряптими?», «Кечирасиз, лекин бу қиз ҳеч нарса қилгани йўқ», — Селена Гомеснинг Time журнали муқовасида пайдо бўлишига Twitter фойдаланувчилари тахминан шундай фикр билдирди. Ушбу соннинг яна 34 нафар қаҳрамони — жумладан Серена Уильямс, Арета Франклин ва Мадлен Олбрайтлар журнал муқовасига тушмади. Кўпчиликнинг таъкидлашича, уларнинг фонида 25 ёшли Гомес анча енгил вазнли бўлиб кўринади, Ҳиллари Клинтон ва Серена Уильямсни Гомесдан фарқли равишда турли авлод вакилларига таништириш шарт эмас.
Селена Гомес ким?
Гомес ким ва унинг кўриниши қанақа эканлигини эслай олмасангиз ҳам, унинг асосий хит қўшиқларидан бири Love You Like А Love Song’ни эшитган бўлсангиз керак. Клип YouTube’нинг ўзида деярли ярим миллиард марта томоша қилинган. Балки «Ҳаммаси тип-топ» ёки «Вэйверли Плэйс сеҳргарлари» болалар мультфильмларини кўргандирсиз. Улар ёш Гомесга 2000 йилларнинг ўрталарида машҳурлик келтирган.
Бундан ташқари, Селена Гомес Adidas учун спорт кийимлари коллекциясини яратган ва шу кунларда Puma билан шартнома имзолади, Netflix’нинг «Нима учуннинг 13 та сабаби» сериалига продюссерлик қилди ва Louis Vuitton’инг юзига айланди. Унинг Twitter’даги обуначалари сони — 53 миллион, Facebook’да — 62 миллионга яқин ва Instagram’да рекорд даражадаги — 128 миллион. Селена Гомес — замонавий ёш поп-юлдузлардан энг машҳури.
Time редакцияси бежизга уни трендсеттер деб атамади: Гомеснинг юз миллионлик обуначилари у билан шартнома тузадиганлар учун тайёр мақсадли аудиториядир. Гомеснинг Американинг Coach либослар ва аксессуарлар маркаси билан битими марка обуначиларининг 50 фоизга ошишига олиб келди. Унинг Cоаch учун биринчи сумкаси чиққандан сўнг эса компания қиймати 2 фоизга ошди. Business Insider’га кўра, унинг аккаунтидаги битта пост нархи — 550 минг доллар.
Disney’нинг яна бир юлдузи
Бритни Спирс каби Гомес ҳам Disney телеканалининг митти юлдузи бўлган. ОАВларининг қайд этишича, Гомес кўп нарсада Бритни Спирс карьерасидан нусха олади, бироқ Спирсдан фарқли равишда Селена Гомес ҳеч қачон ўрнак бўладиган ижобий поп юлдуз мавқеидан узоқлашмади. Унинг ёши катта ҳамкасблари таъкидлашича, Селена Гомесни Disney’нинг бошқа ёш юлдузларидан вазминлик ва ўзига ишонч ажратиб турган.
Business оf Fashion’га интервьюсида Селена Гомес ўзига ишонч — соғлом тарбия маҳсули эканлиги: унинг онаси у дунёдаги энг яхши эмас, аслида ким бўлса ўшалигича қолиши кераклигини доим эслатиб турганлигини маълум қилади.
Гомесни одатда «қўшиқчи ва актриса» деб аташларига қарамасдан, кинода ҳозирча омади унчалик чопмаган. «Ёмон ҳулқ» комедиясини ҳисобга олмаганда у катта киноролни ижро этишга эришмади. Ҳозир у Вуди Алленнинг номи ошкор этилмаган фильмида суратга тушаяпти.
Вафодор, меҳрибон ва сахий
Vogue’нинг «73 та савол» рубрикасида Гомес ўзига учта: вафодор, меҳрибон, сахий сўзлари билан таъриф беради. «Бундай ҳаёт тарзида самимий ва очиқ бўлиш зарур — чунки бу иш катта масофани тақозо қилади: кўпинча одамлардан узоқдасан», — дейди 21 ёшли Гомес InStyle’га интервьюсида. Ушбу масофани қисқартиришда унга Instagram кўмаклашади: актриса, мухлислари каби ижтимоий тармоқдан кундаликдек фойдаланади.
Қўшиқчини кўп танқид қилишади: у тўпиғини кўрсатган Абу-Даби масжидидаги сурати учун ҳам, ҳатто муҳожир болалар учун ёрдам дастурини бекор қилмаслик тўғрисидаги Оқ уйга мурожаати учун ҳам. Селена Гомес имкон борича самимий кўринишга ҳаракат қилганда ҳам шубҳа уйғотади. Қўшиқчининг 2017 йил майидаги Bad Liar клипи билан ҳам шундай ҳолат юз берган эди. У чиқишидан бир кун аввал Гомес Instagram’га қўлида «RISK» ёзуви туширилган сариқ билагузукли ғамгин суратини жойлади; у шу заҳоти депрессиядаги одам образини эксплуатация қилишда гумон қилинди. Билагузук аслида ҳақиқий эди: у қўшиқчига бир кун аввал шифохонадан берилган эди.
Қулаб тушиш хавфи
2013 йилнинг охирида Селена Гомес «бироз вақтни ёлғиз ўтказиш учун» биринчи яккахон альбоми Starс Данcеъни қўллаб-қувватловчи турнинг бир қисмини бекор қилди. Қўшиқчининг вакиллари бунинг наркотиклар ва алкоголь билан ҳеч қандай алоқаси йўқлигини эълон қилишга шошилди, таблоидлар эса шу заҳоти буни Гомес ва Жастин Бибернинг ажралишига боғлади. Икки йилдан сўнг Гомес Billboard журналига интервьюда 2013 йилда ошкор қилмаган ҳолатни маълум қилди: у тери силининг бир турига чалинган. Аниқланган хасталик туфайли у чиқишларини бекор қилишга мажбур бўлган — бу унга кимёвий муолажа ва реабилитация, жумладан руҳий тикланиш учун керак эди. «Ҳаммага: нима ҳақида гапираётганингизни тасаввур ҳам қила олмайсиз дегим келарди. Ўзимни оқлаш заруратини ҳис қилганимдан қаттиқ ғазабда эдим», — дейди қўшиқчи.
2015 йилда Гомесда хасталик чақирган депрессия ва ваҳима ҳужумлари бошланди. Қўшиқчи билагузугидаги «RISK» сўзи ҳушидан кетиб қолиш хавфи бўлган тери силига чалинган беморларга бериладиган «FALL RISK» (яъни «йиқилиб тушиш хавфи») иборасининг бир қисмидир.
2017 йилнинг 14 сентябрида Селена Гомес Instagram’га яқин дугоналаридан бири актриса Франция Райс билан бирга шифохонада тушган суратини жойлади: тери сили келтириб чиқарган асоратлар туфайли Гомесга буйрак кўчириб ўтқазиш талаб этилди. Дугонаси унга буйрагини берди.
Шундан буён қўшиқчининг Instagram’даги саҳифасида спортзалдаги сурати ва у Puma юзига айланганлиги ҳақидаги пост жойланди. Унинг қўшиқлари, фильмлари ва миллионлаб обуначиларини ҳисобга олмаганда бу янгиликларнинг барчаси оддий одам дунёсига тегишлидек. Эҳтимол, айнан шу оддийлик ва инсонийлик унинг мухлисларини у томонга оғдирар; ижтимоий тармоқлардаги машҳурлиги сабаблари ҳақидаги саволга Селена Гомеснинг ўзи «Билмайман» деган самимий жавобни беради.
Изоҳ (0)