Президент Шавкат Мирзиёев Абу-Даби шаҳрига ташрифнинг ишбилармонлик дастури доирасида АMEА Power компанияси раҳбари Ҳусайн ал-Новайс, М42 компанияси раҳбари Ҳасан Жасим ал-Новайс ва IFFCО Group компанияси раҳбари Шероз Алланни қабул қилди. Бу ҳақда Президент матбуот хизмати хабар берди.
АMEА Power — қайта тикланувчи энергия соҳасида тез суръатда ривожланаётган компания. 20 мамлакатда умумий қуввати 6 гигаваттдан ортиқ бўлган лойиҳалар портфелига эга. М42 инновацион технологиялардан фойдаланган ҳолда тиббий хизмат кўрсатиш соҳасида етакчи компаниялардан бири ҳисобланади. IFFCО Group озиқ-овқат соҳасида 100 дан ортиқ брендларни бошқаради.
Энергетика, инновациялар, соғлиқни сақлаш ва озиқ-овқат саноатида қўшма лойиҳаларни илгари суриш ҳамда БАА компаниялари билан инновацион ҳамкорликни кенгайтириш масалалари кўриб чиқилди.
АMEА Power компанияси билан ҳамкорлик жадал ривожланиб бораётгани мамнуният билан қайд этилди. Шамол электр станциялари, энергия сақлаш тизимларини қуриш, нефть-кимё соҳасида юқори технологик ишлаб чиқаришларни ташкил этиш лойиҳаларини жадаллаштиришга алоҳида эътибор қаратилди.
Бундан ташқари, М42 компанияси билан геномика соҳасида, IFFCО Group билан эса озиқ-овқат саноати ва маиший кимё учун ингредиентлар ишлаб чиқаришда ўзаро манфаатли шерикликни мустаҳкамлашга эътибор қаратилди.
Изоҳ (0)