Европа футбол ассоциациялари иттифоқи (UEFА) Исроил кучлари томонидан ўлдирилган Фаластин миллий терма жамоаси собиқ аъзоси Сулаймон ал-Убайдга бағишлаб хотира пости эълон қилди. “Ливерпуль” ҳужумчиси Муҳаммад Салоҳ эса UEFАни ўлим тафсилотларини айтиб ўтмагани учун танқид остига олди.
Фаластин футбол ассоциацияси (PFA) маълумотига кўра, “фаластинлик Пеле” номи билан танилган 41 ёшли Ал-Убайд Ғазо жанубида гуманитар ёрдам учун навбат кутаётган вақти Исроил кучлари томонидан уюштирилган ҳужум қурбони бўлган. UEFА ижтимоий тармоқлардаги қисқа постида уни “энг оғир даврларда ҳам минглаб болаларга умид берган истеъдод” дея таърифлади.
“У қандай, қаерда ва нима сабабдан вафот этганини ҳам айта оласизми?”, деб ёзди Муҳаммад Салоҳ UEFАга мурожаат қилиб.
Европа футбол ассоциациялари иттифоқи эса ҳозирча бунга изоҳ бермади.
Фаластин футбол ассоциацияси (PFA) Исроилнинг Ғазога ҳужумлари натижасида 325 нафар футболчи, мураббий, ҳакам ва бошқалар ўлдирилганини маълум қилди. Ташкилот кейинчалик ўз саҳифасида UEFА президенти Александр Чеферин номидан баёнот жойлади. Унда Ал-Убайд “оғир шароитларга қарамай, одамлар қалбида қувонч униши мумкинлигининг исботи” сифатида таърифланган.
“У ўз истеъдоди ва жонкуярлиги билан Ғазо болаларига орзулар рўёбига умид берди. Унинг ўлими футбол олами ва спортнинг одамларни бирлаштириш кучини англайдиган ҳар бир инсон учун катта йўқотишдир”, дейилади баёнотда
Исроилнинг 2023 йил 7 октябрда бошланган ҳужумлари сабаб Ғазода 61 мингдан ортиқ тинч аҳоли ҳалок бўлди. Халқаро босимга қарамай, яҳудий давлати ҳарбий ҳаракатларни тўхтатмаяпти.
Изоҳ (0)