Украинадаги можарога тезроқ барҳам бериш учун зудлик билан тинчлик музокараларини бошлаш керак. Бу ҳақда АҚШнинг собиқ президенти Дональд Трамп Невада штатидаги тарафдорлари билан учрашув чоғида гапирди.
«Ҳозир Россия ва Украина ўртасида можаро бор. Биз урушни тинч йўл билан тугатиш бўйича зудлик билан музокараларга келишимиз керак, акс ҳолда учинчи жаҳон урушига дучор бўламиз», — деди Трамп.
Трамп Россия ва Украинани музокара столига ўтиришга биринчи марта чақираётгани йўқ. Сентябрь охирида у икки давлатга ўз воситачилигини таклиф қилганди.
«Стратегик бўлинг, ақлни ишлатинг. Ҳозир айни келишувни тугаллаш вақти. Ҳар икки томон ҳам бунга муҳтож ва буни хоҳлайди. Бутун дунё хавф остида. Томонларнинг гуруҳига раҳбарлик қилайми?» — деган Трамп.
Аввалроқ Трамп АҚШнинг амалдаги президент Жо Байден маъмуриятини танқид қилиб, уни можарони бошлаганликда айблаган эди.
Изоҳ (0)