Эрон президенти Масъуд Пезешкиён кортежидаги автомобилларга суюлтирилган бензин қуйилгани сабабли таксига ўтиришга мажбур бўлди. Бу ҳақда NasrNews хабар берди.
Президентнинг махсус инспектори Мустафо Молавийнинг айтишича, воқеа Пезешкиённинг Табризга норасмий ташрифи пайтида юз берган. Казвин вилоятидаги ёнилғи қуйиш шохобчасида президент кортежидаги учта автомобилга сув аралаштирилган бензин қуйилган. Натижада улар белгиланган манзилга етиб бора олмаган. Оқибатда президент хусусий таксида Табризга йўл олишга мажбур бўлган.
Масъуд Пезешкиён ушбу ҳодисага жавобан ҳеч қандай расмий чора кўрмади, аксинча хусусий таксида Табризга йўл олди, дейилади хабарда.
Fars нашрининг хабар беришича, 16 июнь куни Пезешкиён Исроилнинг Теҳронга уюштирган ҳужуми пайтида яраланган. У оёқларидан енгил жароҳат олган. Бу воқеа Миллий хавфсизлик олий кенгаши йиғилиши вақтида содир бўлган. Исроил ҳарбийлари бинонинг кириш ва чиқиш йўлларига олтита бомба ёки ракета билан зарба бергани айтилмоқда.
Шундан сўнг президент бўлган бинода электр таъминоти узилган. Аммо амалдорлар бинодан фавқулодда люк орқали чиқиб кетишга эришган. Ҳужум Ливаннинг “Ҳизбуллоҳ” гуруҳи етакчиси Ҳасан Насруллонинг ўлдирилиши “андозасида” амалга оширилган. Исроил зарбани жуда аниқ маълумотлар асосида бергани сабаб Эрон ички тергов олиб бормоқда.
Изоҳ (0)