Мексика Googleʼни Мексика кўрфазини “Америка кўрфази” деб қайта номлагани учун судга берди. Мамлакат 2025 йил январь ойида ҳудуд номини ўзгартирмаслик тўғрисида такрорий огоҳлантиришлар юборган, аммо бу сўровлар эътиборсиз қолдирилган. Бу ҳақда BBC хабар берди.
Мексика президенти Клаудия Шейнбаум даъво қаерга берилганини ошкор қилмаган. 9 май куни республикачилар бошчилигидаги АҚШ Вакиллар палатаси кўрфазни федерал идоралар учун расман қайта номлашга овоз берган.
АҚШ президенти Дональд Трамп январь ойида кўрфаз номи “у ердаги ишларнинг катта қисмини АҚШ бажаргани сабабли” ўзгартирилаётганини айтганди.
Шейнбаум ҳукумати Трампнинг қарори фақат континентнинг АҚШ қисмида амал қилишини айтган. Шунингдек, АҚШ бутун кўрфазни қайта номлаш ваколатига эга эмаслиги таъкидланган.
Клаудия 2025 йил январь ойида Googleʼга хат ёзиб, ундан Мексика кўрфазини АҚШ фойдаланувчилари учун қайта номлаш қарорини қайта кўриб чиқишни сўраган.
Google бунга жавобан расмий ҳукумат манбалари жой номларини янгиласа, компания ҳам шунга асосланиб иш тутишини маълум қилганди. Унда айтилишича, АҚШ, Куба ва Мексика билан чегарадош кўрфаз мексикалик илова фойдаланувчилари учун ўзгартирилмайди. Дунёнинг бошқа жойларидаги фойдаланувчилар эса “Мексика кўрфази (Америка кўрфази)” деб номланган ёрлиқни кўришади.
АҚШ президенти Дональд Трампнинг Саудия Арабистонига бўлажак ташрифи чоғида Қўшма Штатлар бундан буён Форс кўрфазини “Араб кўрфази” деб аташини маълум қилганди.
Эрон ташқи ишлар вазири Аббос Арақчи бунга жавобан “бемаъни миш-мишлар, маълумотни нотўғри талқин қилишдан бошқа ҳеч нарса эмас” ва “бундай ҳаракат барча эронликларнинг ғазабини келтиришини” айтган.
Изоҳ (0)