АҚШ ва Украина президентлари Дональд Трамп ҳамда Владимир Зеленский 8 май куни кечқурун телефон орқали мулоқот қилди. Бу ҳақда Украина президенти ўзининг ижтимоий тармоқлардаги саҳифаларида маълум қилган.
Зеленскийнинг айтишича, суҳбат давомида улар Олий Рада АҚШ билан фойдали қазилмалар бўйича битимни ратификация қилгани, шунингдек, “тинчликка эришиш учун қўшимча саъй-ҳаракатлар зарурлиги” ҳақида фикр алмашишган.
Шунингдек, Зеленский Украина “бугундан бошлаб” 30 кунлик ўт очишни тўхтатишга тайёр эканини ва Россиянинг бу таклифни қабул қилишини умид қилаётганини таъкидлаган.
“Суҳбат давомида Украинанинг ҳар қандай форматдаги музокараларга тайёрлигини тасдиқладим. Бироқ бунинг учун Россия урушни тугатиш ниятининг жиддийлигини тўлиқ ва сўзсиз ўт очишни тўхтатишдан бошлаши орқали кўрсатиши лозим. Президент Трамп бу уруш тугашини хоҳлаётганини, ёрдам беришга тайёрлигини ва ўт очишни тўхтатиш зарурлигини қўллаб-қувватлашини тасдиқлади”, дейди Зеленский.
Украина президентининг фикрича, АҚШ Россияни 30 кунлик сулҳга кўндира олиши мумкин.
“Россияликлар ўт очишни тўхтатишни қўллаб-қувватлашлари керак. Улар урушни тугатишга тайёр эканликларини исботлашлари лозим. Ўттиз кун тинчлик йилларининг бошланиши бўлиши мумкин. Ўт очишни тўхтатишнинг ўзи, узоқ муддатли ва ишончли бўлса, тинчликка томон ҳаракатнинг ҳақиқий кўрсаткичи бўлади. Америка бу борада ёрдам бериши мумкин. Дунё 80 йил аввалгидек Америкага муҳтож”, дейди Украина президенти.
АҚШ президенти Дональд Трамп ўзининг Truth Social ижтимоий тармоғидаги саҳифасида Россия ва Украина билан музокаралар давом этаётганини ёзган.
“АҚШ, энг яхши ҳолатда, 30 кунлик сўзсиз ўт очишни тўхтатишни талаб қилмоқда. Умид қиламизки, мақбул ўт очишни тўхтатиш режимига риоя қилинади ва ҳар икки давлат ушбу тўғридан-тўғри музокаралар дахлсизлигини таъминлаш учун масъул бўлади. Агар ўт очишни тўхтатишга риоя қилинмаса, АҚШ ва унинг ҳамкорлари қўшимча санкциялар жорий этади”, дейди Трамп.
Унинг сўзларига кўра, вақтинчалик ўт очишни тўхтатиш пировардида тинчлик битимига олиб келиши керак.
АҚШ президенти Дональд Трамп туркиялик ҳамкасби Ражаб Тоййиб Эрдўғонга мурожаат қилиб, Украина масаласида воситачилик қилишни сўрагани, Эрдўғон эса АҚШдан Ғазо секторида отишмани тўхтатишда кўмаклашишни илтимос қилгани хабар қилинганди.
Апрель ойи охирида Украина ва АҚШ биргаликда фойдали қазилмаларни қазиб олиш ва Украинани тиклаш учун инвестиция фондини ташкил этиш тўғрисидаги битимни имзолаганди.
Изоҳ (0)