Малдив ороллари исроилликларга ўз ҳудудига киришни тақиқлади. Бу ҳақда президент идораси хабар берди. Малдив ҳукумати Исроилни Ғазодаги урушда фаластинликларга қарши геноцид содир этганликда айблади, аммо бу айбловни Исроил бир неча бор рад этган.
Мамлакат президенти Муҳаммад Муиззу сешанба куни парламент томонидан қабул қилинган мамлакатнинг иммиграция тўғрисидаги қонунига киритилган тузатишни ратификация қилди. Ушбу қонунга тузатишда Исроил паспорти билан ташриф буюрувчиларнинг Малдив оролларига киришини тақиқловчи янги қоида киритилган.
“Ратификация Исроил томонидан Фаластин халқига нисбатан давом этаётган ваҳшийлик ва геноцид ҳаракатларига жавобан ҳукуматнинг қатъий позициясини акс эттиради”, дейилади баёнотда.
Исроил ташқи ишлар вазирлиги ва мамлакатнинг Коломбодаги консуллик идораси бу вазиятга изоҳ билдирмади.
Исроил геноцид бўйича ҳар қандай айбловни қатъиян рад этиб келмоқда. Мамлакат халқаро ҳуқуқ меъёрларига риоя қилганини ва 2023 йил 7 октябрь куни ҲАМАС томонидан уюштирилган чегаралараро ҳужумдан сўнг ўзини ҳимоя қилиш ҳуқуқига эга эканини таъкидлайди.
Изоҳ (0)