Украинадаги уруш 2025 йилда тугаши мумкин, лекин икки хил йўл билан. Бу ҳақда Венгрия бош вазири Виктор Орбан Магяр Namzet нашрига берган интервьюсида маълум қилди.
“Жанговар ҳаракатлар 2025 йилга келиб якунига етади. Бу ё тинчлик битими билан, ё можаро томонларидан бирининг йўқ қилиниши билан тугайди”, деди сиёсатчи.
Унга кўра, Ғарбнинг Украинага сарфлаган маблағлари беҳуда кетган, оқибатда мамлакат ўз иқтисодиётини қўллаб-қувватлашга қодир эмас. Германия ва Франциядаги сиёсий инқирозлар эса Ғарбнинг нотўғри стратегияси оқибатларининг бошланиши, холос.
“Америка ва Европа биргаликда урушга қарийб 300 миллиард евро сарфлади. Бу пулга бутун Европада турмуш даражасининг тез ўсишига эришиш мумкин эди. Биз бутун Болқонни Европа тараққиёти даражасига кўтаришимиз мумкин эди. Миграцияни жиловлашимиз, Европанинг мутлақо янги мудофаа тизимини барпо этишимиз мумкин эди. Аммо бу пуллар ёниб кетди”, деди Орбан.
Венгрия бош вазири оқибатда “Украинанинг инфратузилмаси, транспорт ва энергетика тизими бутунлай вайрон бўлгани ва яқин келажакда мамлакат ўз иқтисодиётини қўллаб-қувватлашга қодир эмаслигини” таъкидлади.
Аввалроқ Орбан Австриянинг собиқ канцлери Волфганг Сюссел билан суҳбатда Украина учун энг мақбул вариант - Россия ва НАТО блоки ўртасида буфер ҳудудга айланиш эканлигини, акс ҳолда украиналиклар ўз мамлакатини йўқотишини айтганди.
2025 йил 20 январда АҚШ президенти лавозимига киришадиган Трамп музокаралар орқали Украина можаросини ҳал этишга ваъда берганди. У бу масалани бир кунда ҳал қила олишини бир неча бор таъкидлаган.
Украина шартлари
Украина қўшинларни 1991 йил чегараларига олиб чиқишни назарда тутувчи “тинчлик формуласи”ни амалга оширишни талаб қилмоқда. Гап 2014 ва 2022 йилларда Россия томонидан у ерда ўтказилган “референдумлар” ва Украинанинг Қрим, Донецк, Луганск, Херсон ва Запорожье вилоятлари ноқонуний аннексия қилингани ҳақида кетмоқда. Москва “тинчлик формуласи” асосида музокаралар олиб бориш имкониятини истисно қилади.
Россия шартлари
Путин ўт очишни тўхтатиш учун ўз шартларини илгари сурди, жумладан, Украина қўшинлари ўзини ўзи мустақил деб эълон қилинган ДХР, ЛХР, Херсон ва Запорожье вилоятларидан олиб чиқилиши, ушбу тўртта ҳудуд ва Қрим гўёки халқаро миқёсда Россиянинг бир қисми сифатида тан олиниши, Украинанинг НАТОга аъзоликдан воз кечиши ва санкцияларни олиб ташлаш. Зеленский бу таклифни “ишониб бўлмайдиган” ультиматум деб атади.
Изоҳ (0)