Россиянинг Санкт Петербург шаҳрида полициячилар ниқоби остида курердан пул ундирган икки ўзбекистонлик қўлга олинди. Бу ҳақда 78.ru хабар берди.
Маълум қилинишича, жабрланувчи ҳам Ўзбекистон фуқароси ҳисобланади. Курер бўлиб ишловчи ўзбекистонлик 21 апрель куни полицияга мурожаат қилган. У 11 апрель куни кечқурун икки номаълум шахс ўзларини полиция ходимлари деб таништириб, унга тўппонча ўқталганини айтган. Шундан сўнг курерга гиёҳванд моддаларни сақлаш бўйича жиноий иш очиш билан таҳдид қилишган. Ўзбекистонлик курер уларга 100 минг рубль (тахминан 15,5 миллион сўм) берган.
Ҳолат юзасидан “босқинчилик” моддаси (Россия Жиноят кодекси 162-моддаси 2-қисми) билан жиноят иши қўзғатилган. Гумонланувчилар 21 апрель куни қўлга олинган. Улар икки нафар Ўзбекистон фуқароси бўлиб чиққан.
Март ойида Петербургда электровелосипеддаги курерларга қарши оммавий рейдлар бошланганди. Ички ишлар вазирлиги бундай текширувлар мунтазам равишда ўтказилишини маълум қилган. Рейнинг илк кунида13 нафар ноқонуний курер қўлга олинганди, шунингдек, 160 дан ортиқ мопед мусодара қилинган эди.
Изоҳ (0)