Россия армияси навбатдаги йирик ҳужум амалиётига ҳозирлик кўрмоқда. Эҳтимолий йўналишларидан бири РФ билан чегарадош Суми вилояти бўлиши мумкин. Бу ҳақда The Telegraph нашри хабар берди.
Нашр манбаларига кўра, Курск вилоятидан чекинган Украина қўшинлари Суми йўналишига жойлаштирилмоқда, бу эса Киев мазкур йўналишдан зарба кутаётганига далолат қилиши мумкин. Аммо The Telegraph суҳбатлашган эксперт Россия армиясининг “Суми фронтини ёриб кириш” эҳтимолини паст баҳолаган.
FDD (Foundation for Defense of Democracies) марказининг Россия дастури директори ўринбосари Жон Ҳардига кўра, рус армияси айни дамда ҳужум амалиётларини чекланган миқёсда, асосан, кичик гуруҳлари орқали олиб борилмоқда.
“Биз кўраётган нарса — ҳужум темпининг ошиши, аммо бу жуда кичик ҳажмда. Улар Украина ҳимоя чизиғида ёриқ очиши мумкин, лекин бу билан стратегик ютуққа эриша олмайди”, деди Ҳарди.
Материалда ёзилишича, рус армияси ҳужум амалиётларининг аксариятини пиёда кучлар орқали амалга оширмоқда. Бунга сабаб сифатида техника ва зирҳли транспорт воситаларининг кучли тақчиллиги кўрсатилган.
Россиянинг техник йўқотишлари:
The Telegraph нашрига кўра, ўтган бир йил ичида Россия
3 000 дан ортиқ танк,
9 000 дан ортиқ зирҳли техника,
13 000 дан ортиқ артиллерия тизимларини йўқотган.
“Захирадаги техникаларга қаралса, уларнинг хизматга яроқли қисми кескин камайгани кўринади. Йил охирига келиб улар қўшимча кучларни сафарбар этишда жиддий қийинчиликларга дуч келишади”, дея хулоса қилган Ҳарди.
Изоҳ (0)