2022 йил 24 февралдан сўнг Россияни тарк этиб, Украина армиясини молиялаштирган, шунингдек, “хорижий агент” ёки “ножўя ташкилот” сифатида рўйхатга олинган халқаро компаниялар Россия бозорига қайтиш ҳуқуқидан маҳрум бўлиши мумкин.
Маълум қилинишича, мазкур ташаббус ортида Владимир Путиннинг ўзи турибди. Аввалроқ Россия президенти ҳукумат расмийларига Ғарб компанияларининг мамлакатга қайтиши учун шароит яратишни, бироқ маҳаллий компанияларга устуворлик беришни буюрган эди.
Россиянинг RBC (РосБизнесКонсалтинг) агентлигига кўра, ҳужжатнинг якуний версияси ҳали расман тасдиқланмаган. Бироқ дастлабки версияда Россия бозорига қайтмоқчи бўлаётган халқаро компания учун қуйидаги талаблар мавжуд:
- душманона позицияга эга бўлмаслик;
- Украина қуролли кучларини молиялаштирмаслик ;
- “ножўя ташкилот” ёки “хорижий агент” рўйхатида бўлмаслик.
Бундан ташқари, Россияни тарк этишдан олдин ишчилари олдидаги мажбуриятларини бажармаган, маош ёки солиқ тўловларини амалга оширмаган компаниялар ҳам қайтиш ҳуқуқидан маҳрум этилиши мумкин.
RBC агентлигининг ёзишича, халқаро компанияларга ишлаб чиқаришни маҳаллийлаштириш, технологияларни Россияга ўтказиш ҳамда илмий ва муҳандислик марказларини мамлакат ҳудудида очиш каби мажбуриятлар ҳам юкланиши мумкин.
Рус армиясининг Украинага кенг кўламли босқинидан бери юзлаб ғарб компаниялари Россия бозоридан чиқиб кетган. Киевдаги Иқтисодий мактаб институтининг маълумотларига кўра, 472 та компания мамлакатни тўлиқ тарк этган, яна 1 360 таси эса фаолият доирасини торайтирган.
Мазкур чоралар АҚШ ва Россия ўртасидаги муносабатлар илиқлашаётган, урушни якунлаш бўйича музокаралар олиб борилаётган бир пайтда муҳокама қилинмоқда.
Изоҳ (0)