Ҳар йили овқатланиш тартибини бузиш билан боғлиқ муаммоларга дуч келаётган беморлар сони ортиб бормоқда. Ижтимоий тармоқларда машҳурларнинг “идеал” қоматларини кўрган минглаб қизлар уларга ўхшашга ҳаракат қилади. Бунинг учун улар ўта жиддий парҳезга ўтади ёки умуман овқат емай қўяди. Натижада айримлар анорексия, булимия, гормонал бузилишлар, меъда-ичак ёки юрак-қон томир тизими билан боғлиқ жиддий муаммоларга дуч келади.
Бу муаммоларни баъзилар мустақил енга олса, айримларга эса ҳам тиббий, ҳам психологик ёрдам зарур. Шундай беморлардан бири 24 ёшли Анастасия Голубевадир. Унинг бўйи 176 см, оғирлиги эса атиги 29 килограммни ташкил этади.
16 ёшгача Анастасиянинг соғлиғи жойида эди, аммо бошқа шаҳарга кўчиб ўтгач, янги синфдошларининг эътиборини қозониш ва машҳур бўлиш истаги билан у озишга қатъий қарор қилади. Бугун ўша давр фотосуратларига қараб, Голубева ўз қомати аслида жуда яхши бўлган экан, деб афсусланади.
Ўртача тана вазнидан озғин кўринишга келиш учун кескин чоралар кўра бошлади: Настя асосан фақат мева ва сабзавотлар билан овқатланар, кунлик рациони бешта шафтоли ва бир пиёла творогдан иборат бўлар эди. Бу тарзда овқатланишни у ҳозиргача давом эттиряпти. Тана вазни тобора камайса ҳам, қиз ўзини барибир семиз ҳис қилган.
Бир йил аввал Анастасия шифохонага ётқизилди. Шифокорлар ёрдами билан вазни 48 килогача чиқди. Аммо уйига қайтгач, у яна ўзини семиз деб ҳисоблаб, қайта озишни бошлади ва 4 ой ичида 19 килограмм йўқотди. Унинг айтишича, касалхонада жисмоний ҳолати даволанган, аммо руҳий муаммоларига ечим топилмаган.
Голубевада ёғ қатлами бўлмагани сабабли доим совуқ қотади. У ҳар доим икки қават кийим кияди, фақат иссиқ чой, кофе ёки илиқ сув ичади.
Бундай аҳвол унинг умумий саломатлигига жиддий таъсир қилган: қизнинг ҳайз цикли бузилган, витамин етишмовчилиги туфайли териси қуриб кетади, ички аъзолар фаолияти сустлашган, ҳатто каравотдан туриш учун ҳам унга бошқаларнинг ёрдами керак.
“Мен оҳиста овқатланишга ҳаракат қиламан, чунки мушакларим деярли йўқлиги сабабли чайнаш жуда қийин. Агар овқат томоғимга тиқилиб қолса, йўтала олмайман ва бўғилиб қолишим мумкин”, дейди Анастасия.
Кўчадаги одамларнинг муносабати турлича. Кимдир унга бармоқ билан кўрсатади, ёмон сўзлар билан ҳақорат қилади, ҳатто ёш болалар тупурган ҳолатлар ҳам бўлган. Бундай вазиятларга қандай муносабат билдиришни билмайди. Унинг ҳаёти тўлиқ издан чиққан, деб ҳисоблайди.
Авваллари онаси унга ёрдам бермоқчи бўлган. Аммо касаллиги туфайли Анастасия яқинлари билан жанжаллашиб қолган ва олти ойдан бери ҳеч ким билан гаплашмайди. У ёлғиз қолган, юрагидагини айтишга бирор дўсти ҳам йўқ.
Хулоса ўрнида: Анастасия Голубеванинг ҳикояси идеал ташқи кўринишга бўлган ҳаддан ташқари интилишнинг қандай фожиали оқибатларга олиб келишини яққол намоён этади. Ижтимоий тармоқлардаги сунъий гўзаллик ортидан қувиш кўплаб ёшларни тўғри йўлдан чалғитмоқда. Аммо инсон саломатлиги — бу энг катта бойлик, уни гўзаллик стандартларига қурбон қилиш мумкин эмас. Овқатланиш тартибининг бузилиши нафақат жисмоний, балки руҳий ёрдамни ҳам талаб этади. Ушбу ҳолат жамиятимизда бундай масалаларга нисбатан кўпроқ эътибор ва тушунча зарурлигини кўрсатмоқда. Настя каби инсонларга эса нафақат тиббий, балки инсоний меҳр ва қўллаб-қувватлаш керак бўлади.
Изоҳ (0)