Вазн ташлаш кўпчилик учун мураккаб жараён бўлиб туюлади. Кўпинча бунга қатъий парҳезлар, машаққатли жисмоний машғулотлар ва чекловлар керакдек кўринади. Бироқ аслида ҳаммаси бундан ҳам осон бўлиши мумкин. Америкалик Чандра Пирс битта оддий одатини ўзгартириб, ҳеч қандай махсус парҳез ва спортзалга қатнамасдан 90 килограмм вазн йўқотишга муваффақ бўлди. Унинг ҳикояси соғлом турмуш тарзига ўтиш қийин эмаслигини яна бир бор исботлайди.
Бугунги кунда вазн ташлаш ҳақида кўплаб нотўғри қарашлар мавжуд. Аслида, агар бу жараёнга тўғри ёндашилса, орзу қилинган қоматга эришиш биз ўйлагандек қийин эмас.
Чандра Пирс исмли аёл узоқ йиллар давомида ўз қоматидан мамнун бўлиб яшади. Бироқ турмушга чиққач, унинг ҳаёти бутунлай ўзгариб кетди. Эр-хотин дастлаб фарзандли бўлишга шошилмади, аксинча, ҳаётдан завқланиб яшашди. Чандра ўша даврдаги овқатланиш одатларини шундай тасвирлайди:
“Биз ҳар куни бирга ишга борар, кечқурун эса турли кафеларда овқатланар эдик. Ўзимни жуда бахтли ҳис қилардим. Доим кечки вақт тўйгунча овқатланардим ва тўйдан олти ой ўтиб, вазним ортаётганини сездим”, деди у.
У бир неча бор ўзини қўлга олишга уринди, аммо тўйиб овқатланиш одатидан воз кеча олмади. Бу ҳолат жуфтлик фарзанд кўришга қарор қилгунига қадар давом этди. Шифокорлар уни дарҳол огоҳлантирди: ҳомиладорлик яхши ўтиши ва бола саломатлиги учун у албатта озиши шарт эди.
Оналик сари илк қадам ташлаган Чандра бир неча бор умидсизликка тушди. Бир марта ҳомиласини йўқотгач, ҳатто фарзанд асраб олиш ҳақида ўйлай бошлади. Бироқ аёл охир-оқибат ўз устида ишлашга қатъий қарор қилди ва ўзгара бошлади.
Бир йил ичида аёл 90 килограмм вазн ташлади. Бундай натижага эришиш учун Пирс фақатгина уйда тайёрланган енгил таомларни ейишни одат қилди. Бу ҳақда аёл шундай дейди:
“Авваллари кўп фастфуд, сендвич ва қовурилган картошка ердим. Айниқса, Olive Garden ресторанининг макаронларини жуда яхши кўрардим, Сўнг кўчадаги кафе ва ресторанларда овқатланишни тўхтатдим ва фақатгина табиий етиштирилган, органик маҳсулотлардан фойдаланган ҳолда уйда таомлана бошладим”.
Бундай оддий одат унинг ҳаёт тарзини бутунлай ўзгартирди ва ортиқча вазндан халос бўлишига ёрдам берди.
Изоҳ (0)